Қирғизистондаги АҚШ элчихонаси наркобарон Колбаевнинг гуруҳи ҳақидаги маълумот учун 1 млн доллар мукофот таклиф қилди
Қирғизистондаги жиноий авторитет Камчи Колбаевнинг жиноий гуруҳини фош қиладиган маълумот учун АҚШ 1 миллион доллар миқдорида мукофот пули таклиф қилмоқда, деб ёзади Американинг Бишкекдаги элчихонасига таяниб, «Интерфакс».
«АҚШ Камчи Колбаевнинг жиноий тармоғини бузиб ташлашга олиб борувчи маълумот учун 1 миллион доллар ҳажмида мукофот пули таклиф қилади», — дейилади элчихона баёнотида.
Матбуот хизмати маълумотларига кўра, АҚШ Қирғизистонда ва бутун дунёда коррупция ва уюшган жиноятчиликка қарши курашни қўллаб-қувватлашда давом этади.
«АҚШ бутун дунёда коррупциянинг беқарорлаштирувчи таъсирини тан олади ва коррупцияга қарши курашни ўз приоритетига айлантирган. АҚШ ҳукумати бир миллиард доллардан ортиқ ҳажмдаги коррупциявий даромадларни мусодара қилган ва жабрланган мамлакатларга муваффақиятли қайтарган. 2020 йилнинг ўзида АҚШ чет давлатларнинг 41 нафар порахўр амалдор исм-шарифларини эълон қилиб, улар ва уларнинг оилаларига АҚШга киришга рухсат бермади, улар орасуда коррупция ва жиноий даромадларни қонунийлаштиришда айбланиб ҳибсга олинган Қирғизистон Божхона хизмати раҳбари собиқ ўринбосари Раимбек Матраимов ҳам бор», — дейилади элчихона хабарида.
2020 йил 22 октябрда Бишкекда Қирғизистон жиноий авторитети Камчи Колбаев қўлга олинган эди.
2012 йилда АҚШ махсус хизматлари Колбаевни дунёдаги энг йирик наркобаронлар рўйхатига киритган. 2017 йилда АҚШ ҳукумати Собиқ Иттифоқ мамлакатларидан ўн нафар жиноий авторитетни «қора рўйхат»га киритган, улар орасида Колбаев ҳам бор эди. АҚШ ҳудудида «қора рўйхат»даги шахсларнинг шахсий мулклари аниқланган тақдирда, улар хатланади.
АҚШ Молия вазирлиги маълумотларига кўра, «Биродарлик доираси» халқаро жиноий гуруҳига кирувчи Колбаев порахўрлик, одам савдоси ва бошқа ноқонуний фаолиятлар билан шуғулланган.
