Озарбайжонда 2020-йил ноябридан бери 88,2 мингдан ортиқ мина тозаланди
Иккинчи Қорабоғ уруши тугаганидан сўнг, 2020-йил ноябридан бери Озарбайжоннинг босиб олинган ҳудудларида 88 260 та мина топилди ва зарарсизлантирилди. Бу ҳақда Озарбайжон миналарга қарши агентлиги (АНАМА) бошқаруви раҳбари Вугар Сулаймонов Агдамдаги миналарга қарши кураш бўйича иккинчи халқаро гуманитар конференсияда сўзлаган нутқида маълум қилди.
Сулаймоновнинг эслатишича, Озарбайжон дунёдаги миналардан энг кўп зарарланган давлатлардан бири ҳисобланади. “Бу яширин хавф-хатарлар нафақат инсоният фожиаларига олиб келади, балки ижтимоий ва иқтисодий тараққиётга ҳам тўсқинлик қилади. Бу ҳам минтақада тинчлик ва барқарорликка жиддий тўсиқ бўлмоқда”, — деди у.
Унинг таъкидлашича, 2020-йил ноябр ойидан буён Қорабоғ вилоятининг 81 386 гектар ҳудуди миналардан тозаланган. “Жами 88 260 та мина ва урушнинг бошқа портловчи қолдиқлари, жумладан, 28 259 та пиёдаларга қарши мина, 15 303 та танкга қарши мина ва 44 698 та портламаган ўқ-дорилар топилди ва тозаланди. Эришилган ютуқларга қарамай, миналар хавфи сақланиб қолмоқда”, - деди Сулаймонов.
Унинг сўзларига кўра, сўнгги 32 ой ичида 302 Озарбайжон фуқароси миналар ва портловчи моддаларнинг уруш қолдиқлари қурбонига айланган. Улардан 57 нафари ҳалок бўлган, 245 нафари яраланган.
