Назария ва амалиёт уйғунлиги: ТДИУда логистика ва молия бўйича мастер-класс

Мамлакатимизда ёшларнинг билим ва ташаббусларини қўллаб-қувватлаш, уларни замонавий касб ва кўникмалар билан қуроллантириш масалалари бугунги кунда давлат сиёсатининг муҳим йўналишларидан бири сифатида эътироф этилмоқда. Шу мақсадда Шавкат Мирзиёев раҳбарлигида 2026-йил 24-февраль куни ёшлар билан ўтказилган мулоқотда илгари сурилган вазифалар ижроси доирасида Тошкент давлат иқтисодиёт университети Молия факультетида “Логистика ва молия: самарали таъминoт занжири қандай ишлайди?” мавзусида мастер-класс ташкил этилди.

Мазкур тадбир олий таълим жараёнида назарий билимларни амалий тажриба билан уйғунлаштиришга қаратилган муҳим ташаббуслардан бири бўлди. Бугунги глобаллашув шароитида логистика ва молия соҳаларининг ўзаро чамбарчас боғлиқлиги тобора ортиб бораётгани, айниқса таъминoт занжири бошқарувида молиявий ресурсларни тўғри тақсимлаш ва логистика жараёнларини самарали ташкил этиш иқтисодий барқарорликнинг муҳим омилларидан бири экани таъкидланди. Шу боис олий таълим муассасаларида назарий билимлар билан бир қаторда амалий тажрибага асосланган машғулотлар ташкил этилиши талабаларнинг касбий компетенцияларини шакллантиришда муҳим аҳамият касб этади.

Мастер-класс давомида логистика соҳасида фаолият юритаётган мутахассис, "Aerostar kogiatcs" МЧЖ бош директори Б. Хабибуллаев томонидан логистиканинг замонавий йўналишлари, таъминoт занжирининг асосий босқичлари ҳамда логистика жараёнларини самарали бошқариш механизмлари ҳақида батафсил маълумот берилди. Хусусан, маҳсулот ёки хизматнинг ишлаб чиқарувчидан истеъмолчигaча етиб бориш жараёнида транспорт логистикасининг ўрни, омборхона тизимлари, юкларни бошқариш, халқаро савдо жараёнларидаги логистика операциялари ҳамда улар билан боғлиқ молиявий жараёнлар кенг ёритилди.

Шунингдек, логистика тизимида таъминoт занжирининг узлуксиз ишлаши учун режалаштириш, ресурсларни оптималлаштириш, транспорт ва сақлаш харажатларини камайтириш, етказиб бериш муддатларини қисқартириш каби омиллар алоҳида муҳим экани таъкидланди. Замонавий логистика жараёнларида рақамли технологиялар, ахборот тизимлари ва халқаро ҳамкорлик механизмларининг роли ҳақида ҳам батафсил фикр юритилди.

Амалий мисоллар ва реал бизнес тажрибаларига асосланган ушбу дарс талабаларда логистика жараёнларини комплекс тушуниш, молиявий ва ташкилий қарорлар қабул қилиш кўникмаларини ривожлантиришга хизмат қилди. Талабалар таъминoт занжири бошқарувининг амалий жиҳатлари, бизнес жараёнларини ташкил этиш ҳамда логистика тизимининг иқтисодиётдаги ўрни ҳақида атрофлича тасаввурга эга бўлдилар.

Бундай амалий машғулотлар олий таълим жараёнида назария ва амалиёт уйғунлигини таъминлаш, талабаларнинг замонавий билим ва кўникмаларини ривожлантириш ҳамда уларни меҳнат бозорига янада пухта тайёрлашда муҳим аҳамият касб этади.

Мадинабону Абдуллаева,
ТДИУ, катта ўқитувчиси.