НАТО Бош котиби: "Россия, Шимолий Корея, Эрон ва Хитой Украинага қарши биргаликда ҳаракат қилмоқда"

НАТО Бош котиби Марк Рутте АҚШнинг 47-президенти этиб сайланган Дональд Трампнинг етакчилик фазилатлари ва унинг Альянсга қўшган ҳиссасини юқори баҳолади. У Россия, Шимолий Корея, Хитой ва Эрон ўртасидаги ҳамкорлик кучайиб бораётган бир шароитда АҚШнинг янги маъмурияти билан ҳамкорлик қилиш истагини билдирди.

Рутте Будапештда бўлиб ўтган Европа сиёсий ҳамжамиятининг 5-саммити очилишида сўзга чиқди.

У АҚШнинг 47-президенти этиб сайланган Дональд Трампни яна бир бор табриклаб, Трамп катта муваффақиятларга эришгани ва у билан янги даврда ҳамкорлик қилишни интиқлик билан кутаётганини айтди.

Бош котиб НАТО давлатларининг мудофаа харажатларини ялпи ички маҳсулотнинг 2 фоизидан ошиб кетиши мақсади Трампнинг қўллаб-қувватлаши туфайли амалга оширилганини ва бу миқдорни ошириш зарурлигини яна бир бор таъкидлади.

"АҚШ халқи уни сайлади. У президент. Мен у билан 4 йил давомида жуда яхши мулоқот қилдим. У ўз режалари ҳақида жуда аниқ. У умумий позицияга эришиш учун биргаликда ҳаракат қилишимиз кераклигини тушунади ва мен буни уддалай оламиз деб ўйлайман". Руттенинг айтишича, агар Россия Украинада ғалаба қозонса, бу нафақат Европа, балки АҚШ учун ҳам таҳдидга айланади.

Саммитда Шимолий Корея аскарларини Украинага қарши жанг қилиш учун Россияга юбориш масаласини кўтариш ўзи учун муҳим эканини тилга олган Рутте: "Шимолий Корея, Эрон, Хитой ва албатта Россиянинг Украинага қарши биргаликда ҳаракат қилаётганини тобора кўпроқ кўраяпмиз".

Рутте, бу давлатлар НАТО ҳамкорлари бўлган АҚШ, Европа ва Осиё-Тинч океани давлатларига таҳдид солаётганини таъкидлаб, бу муаммони саммитда ҳал этиш ниятида эканини айтди.

"Мен президент Трамп билан учрашишни ва бу таҳдидга (Россия, Шимолий Корея, Хитой ва Эрондан) қарши биргаликда қандай ҳаракат қилишимиз ва дунёнинг ўз қисмимиз хавфсизлиги ва фаровонлигини қандай таъминлашимиз мумкинлигини муҳокама қилишни интиқлик билан кутаман" - деди НАТО Бош котиби.

"Дональд Трампнинг ғалабаси Украина учун нимани англатади?" деган саволга НАТО раҳбари қуйидаги сўзлар билан жавоб берди: "Ўйлайманки, бу барчамиз учун нимани англатади, тажрибали президент бор, у нимани хоҳлашини аниқ билади. Бу бизни ҳимояга кўпроқ сарфлашга мажбур қилади. У бу борада ҳақ. У хоҳлаган нарсасини олди. Ўйлайманки, Трамп келажакда бундан ҳам кўпроқ нарсани қилади".