Нарзулло Обломуродов: "Самарқандда тоза ичимлик суви бўйича муаммолар кўп"
Куни кеча Ўзбекистон Экологик партиясидан Ўзбекистон Республикаси президентлигига номзод Нарзулло Обломуродов Самарқандда сайловчилар билан учрашди. Бу ерда номзод сайловчиларни ўз дастури билан таништирди.
Нарзулло Обломуродов ўз сўзида бир қатор экологик муаммоларга тўхталиб ўтди. Хусусан, Ўзбекистонда, айниқса, Самарқандда тоза ичимлик суви бўйича муаммолар кўп эканлигини айтиб ўтди. Шунингдек, чиқиндилар тўғрисидаги қонун бугунги кун ва талабларга жавоб бермаслигини, чиқиндилар билан боғлиқ масалаларни тубдан янги босқичга олиб чиқиш зарурлигини таъкидлади. Ўзбекистон бугунги кунда БМТ ва Жаҳон Банки таҳлили бўйича дунёдаги ичимлик суви мураккаб жойлашган 10 та давлат орасига кириши қўшимча қилди.
"Сувга бўлган муносабатни тубдан ўзгартиришимиз, янги дастурни амалга тадбиқ этишимиз керак. Ариқларда чиқинди тўпланиши, жумракларнинг очиқ қолиши, ичимлик сувини беҳуда исроф қилишимиз охири яхшиликка олиб келмайди. Биз сув таъминоти бўйича катта муҳим дастурни қабул қиламиз", — деди Нарзулла Обломуродов.
Йиғилишда номзод яшил ҳудудларни кенггайтириш бўйича муҳим ташаббусларни амалга оширилишини айтиб ўтди. Мавжуд яшил ҳудудларни сақлаш борасида ҳам амалий ишлар жадаллатирилиши маълум қилинди.
"Глобал иқлим ўзгариши бўйича мамлакатда иссиқхона газлари заҳирасини қисқартириш бўйича ҳаракатлар режасини ишлаб чиқиш ва амалга ошириш бугунги куннинг энг долзарб вазифаларидан", — деди Экологик партия лидери.
Назрулло Обломуродовнинг қуйидаги фикрларини сайловчилар ижобий қарши олди: "Аҳолига қулайлик яратиш мақсадида электон ҳукумат тизими янада кенг жорий этилади. Давлат хизматларини кўрсатиш самарадорлиги оширилади. Бу ишлар пандемия даврида пайдо бўлган узун навбатларни олдини олади. Мамлакатимизда ҳозирги кунда 3 миллион автомобиль бор. Улардан эса чексиз заҳарли моддалар атмосферага чиқади. Буларни олдини олиш мақсадида кундалик ҳаётимизда табиатга бўлган муносабатимизни ўзгартиришмиз керак. Энг катта хатомиз шундан иборатки, биз кимдир қилиб бериши керак, деб яшаймиз. Аслида, ўзимиз ҳаракат қилишимиз керак. Биз экология, аҳоли саломатлиги йўлида одамларнинг фикрларини ўзгартиришга уринамиз".
Нарзулло Обломуродов Самарқандлик сайловчилар билан учрашувда Мўйноқ тақдири ҳақида ҳам гапирди. У Мўйноқда қилинаётган ижобий ишларни янада жадаллаштириб ҳудуд фаровонлиги таъминланишини айтиб ўтди. Мўйноққа, Оролга борган барча инсонларнинг фикри бутунлай ўзгаришини қўшимча қилди.
