Мактаб битирувчилари шаҳодатномалари ўзбек ва инглиз тилларида шакллантирилади
Таянч ўрта таълим, умумий ўрта таълим тўғрисидаги шаҳодатнома, психик ривожланишида нуқсони бўлган болалар учун ихтисослаштирилган мактабни тамомлаганлик тўғрисидаги сертификатлар электрон тарзда ўзбек ва инглиз тилларида шакллантирилади. Бу ҳақда Мактабгача ва мактаб таълими вазири Ҳилола Умарова маълум қилди.
"Мазкур тартиб ўрта таълим тўғрисидаги шаҳодатномага эга битирувчиларнинг юртимиздаги ҳамда халқаро битим имзолаган давлатлар ҳудудидаги коллеж, техникум ва олий таълим ташкилотларига кириш учун ҳужжатларни топшириш ҳуқуқини беради", – дейилади хабарда.
Қайд этилишича, электрон шаҳодатномалар битирувчиларга ҳар йили 20 июнга қадар берилади.
Бунинг учун битирувчилар шаҳодатномани электрон платформадан шахсини тасдиқловчи ҳужжатидаги тегишли маълумотларни киритиш орқали бепул юклаб олиши мумкин бўлади.
"Энг аҳамиятлиси, шаҳодатномалар йўқолган ёки яроқсиз ҳолга келган тақдирда, битирувчиларга дубликат шаҳодатнома берилмайди. Битирувчилар шаҳодатномани электрон платформадан ўзи истаган вақтда бепул қайта юклаб олиши мумкин бўлади", дея қўшимча қилган вазир.
Таъкидлаш лозим, олдинроқ мактаб битирувчилари олий ўқув юртига ҳужжат топшириш учун Билим ва малакаларни баҳолаш агентлигининг (собиқ ДТМ) “АБИТУР” дастурига интеграция қилинган ҳолда ҳужжатларни онлайн топшириш имконияти яратилгани ҳақида хабар қилгандик.
