Макрон НАТОнинг Токиодаги ваколатхонасини очишга қарши

Франция президенти Эммануэл Макрон Японияда НАТО ваколатхонаси очилишига қарши эканлигини маълум қилди. Унинг сўзларига кўра, альянс ўз ишини Шимолий Атлантика минтақаси билан чеклаши керак. Бу ҳақда The Financial Times нашри манбаларга таяниб хабар бермоқда.

Макроннинг фикрича, Япония НАТО учун устувор аҳамиятга эга эмас.

Шунингдек, президент Токиода альянс ваколатхонаси очилиши Хитойнинг Европага ишончини сусайтириши мумкинлигидан қўрқади, дейди газета манбалари.

ФТ маълумотларига кўра, Франция НАТО ва Хитой ўртасидаги кескинликни кучайтириши мумкин бўлган ташаббусларни қўллаб-қувватлашни истамайди.

Қайд этилишича, Токиода НАТО офисининг очилишига альянснинг барча аъзолари рози бўлишлари керак, бундай имкониятдан фойдаланиб Франция ушбу қарорни блоклаши мумкин.

Эслатиб ўтамиз, май ойида НАТО бош котиби Йенс Столтенберг альянс Япония билан биргаликда Токиода ўз ваколатхонасини очиш масаласини муҳокама қилаётганини айтган эди. Агар бу амалга оширилса Япония Осиёда НАТО билан алоқа идорасини очган биринчи давлат бўлади.