Литва Беларусь АЭСи ишини тўхтатишни сўрамоқда
Литва атом энергетикаси хавфсизлиги давлат инспекцияси Беларусь АЭС биринчи ва иккинчи блоклари фаолиятини тўхтатишни сўраб мурожаат этган.
Инспекция Беларусь томонидан иккинчи блокнинг совутиш реактори контури органик моддалар билан, биринчи энергоблокнинг циркуляцион контури эса радионуклидлар билан ифлослангани тўғрисидаги хабарларни тушунтиришни талаб этмоқда.
Шунингдек, реактор корпуси маҳкамлангани, аниқланган дефектлар ва тугалланмаган ишлар бўйича изоҳлар сўралган.
Инспекция аввалроқ АЭС учун танланган жойнинг сейсмик ва йирик авиакатастрофа оқибатлари бўйича тавсия этилган стресс-тестлар ва хавфсизликни баҳолаш бўйича қўйилган саволларга ҳам жавоб олмаган.
Эслатиб ўтамиз, Беларусда АЭС қурилишидан бошлаб унинг мақсади иқтисодий эмас, сиёсий эканлиги яширилмаган. Яъни Беларусь АЭСи орқали болтиқбўйи давлатлари, айниқса Литвани энергетик қарамликда ушлаб туриш мақсади бўлган.
Электр энергия генерациясининг альтернативалардан юқори таннархига қарамай, АЭС қурилиши учун Россиядан олинган кредит ҳеч қачон қайтарилмаслигини била туриб, Беларусь шу АЭСни қуришга Кремль тарафидан мажбур қилинган. Биринчи энергоблок ишга тушганидан буён ярим муддат вақтини ремонтда ўтказган, иккинчи энергоблок лойиҳада белгиланганидан қарийб икки йил кечикиб 2023 йил 13 май куни ишга туширилган.
