Жанубий Кореядаги самолёт ҳалокати ҳақида нималарни биламиз?

Жанубий Кореядаги Муан халқаро аеропортида бортида 181 киши бўлган самолёт ҳалокатга учради , 85 киши ҳалок бўлди, деб хабар берди фавқулодда вазиятлар расмийлари.

"Ҳозиргача икки киши қутқарилди ва 85 киши ҳалок бўлди", деди Миллий ёнғин бошқармаси баёнотида, қутқарув операцияси давом этмоқда.

Жежу Аир рейси Таиланднинг Бангкок шаҳридан қайтаётган эди, қўниш вақтида бу воқеа содир бўлди.

Фавқулодда хизматлар ва маҳаллий янгиликлар дастлаб самолётда қўниш мосламасида муаммо борлиги ҳақида хабар беришди.

Кейинроқ ёнғин хавфсизлиги агентлиги қушларнинг урилиши билан бир қаторда ҳалокатга об-ҳаво шароити сабаб бўлганини айтди.

"Авария сабаби ноқулай об-ҳаво шароити билан бирга қушларнинг урилиши бўлгани тахмин қилинмоқда. Бироқ аниқ сабаб қўшма текширувдан сўнг эълон қилинади", - деди Муан ёнғин хавфсизлиги бўлими бошлиғи Ли Чжон Хён брифинг чоғида.

Ҳалокат ҳақида нималарни биламиз?

Самолёт бортида 175 йўловчи ва олти экипаж аъзоси бўлган. Йўловчилар орасида икки нафар Таиланд фуқароси ҳам бўлган, деди Транспорт вазирлиги.

Ўт ўчириш агентлигининг маълум қилишича, воқеа жойига 32 ўт ўчириш машинаси ва кўплаб ўт ўчирувчилар сафарбар этилган.

Бу Жанубий Кореянинг 2005-йилда ташкил этилган лоукостер Жежу Аир тарихидаги биринчи ҳалокатли авариядир.

Авиакомпания якшанба куни узр сўраб чиқди.

"Биз - Жежу Аир авиакомпанияси ушбу аварияга жавобан қўлимиздан келганини қиламиз. Хавотирга сабаб бўлганимиз учун чин дилдан узр сўраймиз", - дейилади Жежу Аир ижтимоий медиа каналларида эълон қилинган баёнотда.

ФлигҳтРадар24 авиация кузатуви сайтида айтилишича, самолёт Боеинг 737-800 бўлиб кўринади. Боеинг ва АҚШ Федерал Авиация маъмурияти изоҳ бериш сўровларига дарҳол жавоб бермади.

Жанубий Корея президенти вазифасини бажарувчи Чой Сунг Мок ҳар томонлама қутқарув ишларини олиб боришни буюрди. Чой мамлакатда давом этаётган сиёсий инқироз шароитида аввалги президент вазифасини бажарувчига импичмент эълон қилинганидан кейин жума кунигина тайинланган эди.

Унинг штаб бошлиғи фавқулодда йиғилиш ўтказди.