Истанбулда Украина буғдойини ортган кема текширувдан ўтди
Халқаро назоратчи гуруҳ Истанбулга етиб келган Украина буғдойини ортган кемани текширувдан ўтказиб бўлди, деб хабар бермоқда РИА Новости.
Тадбир тахминан бир соатга чўзилган. Унда Туркия, Украина, Россия ва БМТ вакиллари иштирок этган.
Сьерра-Леоне байроғи остида сузаётган юк кемаси кеча оқшомда Одессадан Истанбулга етиб келган эди. Маккажўхори ортган кема учун берилган денгиз йўлаги Қора денгизнинг шимоли-ғарбий қисмидан ўтади.
22 июль куни Россия, Украина, Туркия ва БМТ вакиллари Россиянинг озиқ-овқат маҳсулотлари экспортига қўйилган чекловни олиб ташлашга ва Украина буғдойини жаҳон бозорига чиқариш бўйича келишувга эришган эди. БМТ Бош котибининг ўринбосари, Африка бўйича Иқтисодий комиссиянинг ижрочи котиби Вера Сонгвенинг таъкидлашича, “озиқ-овқат келишувининг бажарилиши” Украинанинг 23 миллион тонна буғдойини жаҳон бозорига чиқариш имконини беради. Зеро, БМТ анчадан буён буғдой тақчиллиги туфайли дунёда озиқ-овқат инқирози юз беришидан огоҳлантириб келаётган эди.
