Исроил Бош вазири: Рафаҳга ҳужум «кўп муаммоларни ҳал қилади»
Ғазо сектори жанубидаги Рафаҳ шаҳрига геноцидда айбланган Исроил армияси томонидан режаланган ҳужум Тел-Авив учун «кўп муаммоларни ҳал қилади».
Бу ҳақда Исроил бош вазири Бинямин Нетаняху Ғазо билан чегара яқинидаги авиашоуда маълум қилди, дея хабар беради Исроил давлат телевидениеси КАН.
«Рафаҳдаги операция кўп масалаларни ҳал қилади. У нафақат қолган баталонларни [Фаластин ҲАМАС ҳаракатининг жангари қаноти], балки уларнинг қочиш йўллари ва таъминот каналларини ҳам қамраб олади», — деди Исроил вазирлар маҳкамаси раҳбари.
Нетаняхунинг таъкидлашича, Исроил ҳозир «муҳим жанг» олиб бормоқда ва унинг якунланиши бизни «душман устидан ғалабага» анча яқинлаштиради.
2023 йил 7-октабр куни ХАМАС ҳужумини олдиндан кўра олмагани учун истеъфога чиқиш ҳақида ўйламаганлиги ҳақидаги саволга жавобан Нетаняху ҳукуматнинг ҳозир ягона ташвиши «ғалаба» эканини айтди.
«Муваффақиятсизлик масаласи ҳукуматнинг ҳар бир аъзосига, шу жумладан менга ҳам тегишли, аммо ҳозир биз фақат ғалаба қозонишга қаратилганмиз. Шу туфайли юзлаб аскарларимиз ҳалок бўлди. Улар бизнинг ғалабамиз учун курашдилар», - деди у.
6 май куни Исроил армияси Ғазо сектори жанубидаги юз минглаб фаластинликлар бошпана топган шарқий Рафаҳ шаҳрини эвакуация қилишни талаб қилди.
7 май куни Исроил Рафаҳга қуруқликдан ҳужум бошлади ва Миср билан чегарадаги худди шу номдаги назорат-ўтказиш пункти қўлга олинганини эълон қилди.
