2026 йилнинг энг абжир “шунқорлари” аниқланди

“Ёшлар ойлиги” доирасида жорий йилнинг 4–6 июнь кунлари Ўзбекистон Республикаси мудофаасига кўмаклашувчи “Ватанпарвар” ташкилоти Марказий кенгаши раиси кубоги учун “Шунқорлар” ҳарбий-спорт ўйинларининг республика босқичи ўтказилди.

Мазкур ўйинларни ўтказишдан асосий мақсад ёшларни Ватанга садоқат ва юксак ҳарбий-ватанпарварлик руҳида тарбиялаш, чақириққача бўлган ёшларни Қуролли Кучлар сафида хизмат қилишга қизиқтириш ҳамда уларни руҳан ва жисмонан чиниқтиришдан иборат.

“Чирчиқ” дала ўқув майдонида ўтказилган “Шунқорлар” ҳарбий-спорт ўйинларининг финал босқичида Қорақалпоғистон Республикаси, Тошкент шаҳри ва вилоятларда истиқомат қилаётган 17 ёшдан 22 ёшгача бўлган 140 нафар ёшдан ташкил топган 14 та жамоа учта блокдан иборат синовларда иштирок этди.

“Ҳарбий-ватанпарварлик блоки”да жамоа аъзоларининг Ўзбекистон тарихи бўйича билимлари синовдан ўтказилди. Шунингдек, “Саф қўшиғи” ва “Биз — бир жамоамиз!” кўрик-танловлари ташкил этилди.

“Ҳарбий-амалий кўпкураш блоки”да жамоалар пневматик қуролдан ўқ отиш, ўқув гранатасини узоқликка улоқтириш ва ҳарбийлаштирилган эстафета бўйича беллашдилар. Ҳарбийлаштирилган эстафета доирасида ёшлар “АК-74” автомати қисмларини ажратиш ва қайта йиғиш, шунингдек, газ ниқобини кийган ҳолда белгиланган масофага югуриш шартларини бажардилар.

“Спорт блоки”да иштирокчилар дуатлон, 100 метрга югуриш ва турникда тортилиш бўйича ўзаро мусобақалашдилар.

Беллашувлар давомида ёшларнинг ғалабага бўлган интилиши, шижоати ва ҳарбий хизматга қизиқиши яққол намоён бўлди.

Дўстона руҳда, айни пайтда шиддатли ва муросасиз кечган “Шунқорлар” ҳарбий-спорт ўйинларининг республика босқичида Тошкент вилояти жамоаси ғолибликни қўлга киритиб, Ўзбекистон Республикаси мудофаасига кўмаклашувчи “Ватанпарвар” ташкилоти Марказий кенгаши раиси кубоги соҳибига айланди.

Иккинчи ўрин Навоий вилояти, учинчи ўрин эса Андижон вилояти жамоаларига насиб этди.

Ғолиб ва совриндор жамоалар аъзолари “Ватанпарвар” ташкилоти, Ёшлар ишлари агентлиги ҳамда Ёшлар иттифоқи томонидан диплом ва қимматбаҳо совғалар билан тақдирланди.

Энг эътиборли жиҳати шундаки, уч кун давом этган мазкур ҳарбий-спорт ўйинларининг республика босқичи якунларига кўра, жорий йилда ҳам 7 нафар йигит ва қиз 3-спорт разрядига эга бўлди.

Айниқса, мусобақалар доирасида ташкил этилган “Раҳбар ва ёшлар” учрашуви иштирокчиларда катта қизиқиш уйғотди. Унда ёшлар “Ватанпарвар” ташкилоти Марказий кенгаши раиси Ҳусан Ботиров билан очиқ мулоқот қилиш имкониятига эга бўлдилар.

Самимий руҳда кечган суҳбат давомида “Ватанпарвар” ташкилотининг ўқув муассасаларида ёшлар учун турли касб-ҳунарларни эгаллаш, шунингдек, спортнинг техник ва амалий турлари билан шуғулланиш учун яратилган имкониятлар ҳақида батафсил маълумот берилди. Учрашув қизғин савол-жавобларга бой тарзда ўтди.

Таъкидлаш жоизки, республика миқёсида мунтазам ўтказиб келинаётган “Шунқорлар” ҳарбий-спорт ўйинлари “Ватанпарвар” ташкилотининг “Ватанпарварлик — олий мақсадимиз!” концептуал ғояси асосида ёшларни бирлаштириш ва уларда ватанпарварлик туйғуларини мустаҳкамлаш учун муҳим майдон бўлиб хизмат қилмоқда.

2025 йил март ойида “Ватанпарвар” ташкилоти Марказий кенгаши, Ёшлар ишлари агентлиги ҳамда қатор вазирлик ва идоралар ўртасида имзоланган “Ҳарбий-ватанпарварлик спартакиадаси доирасида ёшлар ўртасида ҳарбий-спорт мусобақалари ва ҳуқуқий танловларни ташкил этиш ҳамда ўтказиш тўғрисида”ги қўшма қарорга мувофиқ, мазкур ўйинларнинг туман (шаҳар), ҳудудий ва республика босқичлари ўтказилиши белгиланган.

Яна бир муҳим маълумот: “Шунқорлар” ҳарбий-спорт ўйинларининг байроғи ва эмблемаси яратилган бўлиб, унинг асосий рамзи сифатида шунқор қуши танланган. Бу бежиз эмас. Чунки шунқор лочинсимонлар оиласига мансуб кучли, чаққон ва абжир қуш ҳисобланади. У кўчма маънода мард, жасур ва иродали инсонга нисбатан ҳам қўлланилади.

Ўзбекистон Республикаси мудофаасига кўмаклашувчи
“Ватанпарвар” ташкилоти Матбуот хизмати.