Германиянинг Volkswagen автоконцерни Россиядаги активларини сотди
Немис автомобил ишлаб чиқарувчиси Volkswagen (VW) Россиядаги барча активларини, шу жумладан Калугадаги автомобил заводини "Авилон" Россия дилерининг Art-Finance компаниясига сотди, дейилади автомобил ишлаб чиқарувчиси 19 май, жума куни эълон қилинган баёнотда.
Хабарда қайд этилишича, битим VW'нинг "Фольксваген Груп Рус" (Калуга заводига эгалик қилади) ва унинг шўъба корхоналари ("Фольксваген Компоненты и Услуги", "Скания Лизинг", "Скания Финанс", "Скания Страхование"), импортчи корхона (сотиш ва сотишдан кейинги хизмат кўрсатиш бизнеси), эҳтиёт қисмлар омбори ва молиявий хизматлар бизнесидаги улушларини қамраб олади.
Харидор "Авилон" кўмагидаги "Арт-Финанс" МЧЖ бўлди. Россия компаниялари ҳамда Россия Федерациясидаги ҳудудлар ва тармоқларнинг ижтимоий-иқтисодий ҳолати ҳақида маълумот берувчи СПАРК таҳлилий тизимига кўра, устав капитали 100 минг рубл бўлган ушбу компания 13 февралда рўйхатга олинган ва 100 фоизи "Авилон" собиқ бош директори Андрей Павловичга тегишли. "Авилон" матбуот котиби изоҳ беришдан бош тортди.
Volkswagen ўзининг пресс-релизида келишув Россия ҳукумати томонидан маъқулланганини билдирди. “Интерфакс” хабарига кўра, қарор 17 апрелда қабул қилинган, битим суммаси 125 миллион евродан ошмаслиги керак (тасдиқланган куни тахминан 11,3 миллиард рубл). Ҳисоб-китобларни амалга ошириш учун "Авилон" ички бозорда валюта сотиб олиши керак бўлади, харид миқдори эса кунига 50 миллион евро билан чекланган. Volkswagen хабарида келишув суммаси аниқланмаган.
