Германия суриялик шифокорларнинг оммавий равишда чиқиб кетишидан хавотирда

Германия соғлиқни сақлаш тизими, агар мамлакатда ишлаётган минглаб суриялик шифокорлар ўз ватанларига қайтишга қарор қилсалар, инқирозга дуч келиши мумкин, дея огоҳлантирмоқда расмийлар.

Германия касалхоналар ассоциацияси раҳбари Гералд Гасснинг айтишича, суриялик мутахассисларнинг оммавий чиқиб кетиши соғлиқни сақлаш тизимига сезиларли таъсир кўрсатади.

«Биз уларнинг Сурияга қайтиш истагини тушунамиз, у ерда уларга талаб катта, аммо бу бизнинг тиббиёт муассасаларимиз учун жиддий зарба бўлади», деди у Der Spiegel газетасига.

Германиядаги Сурия шифокорлар ва фармацевтлар уюшмаси (SyGAAD) ўтказган сўров натижаларига кўра, суриялик шифокорларнинг 75 фоизи Башар ал-Ассад режими қулагандан кейин ватанига қайтишни ўйлашмоқда.

Психиатр ва SyGAAD аъзоси доктор Меҳиар Алхашрумнинг аниқлик киритишича, Германияда Суриядан келган 6 мингга яқин шифокор ишлайди, расмий маълумотларга кўра, Германия фуқаролигини олганларни ҳисобга олсак, уларнинг умумий сони 10 мингга етиши мумкин.

У кўплаб шифокорлар ўз ватанлари олдидаги бурчини ҳис қилишлари ва уни тиклашда иштирок этишни хоҳлашларини таъкидлади.

«Сурияда шифокорлар анъанага кўра юқори ҳурматга сазовор бўладилар, бу Германияда баъзида этишмайди», деди Алхашроом Брусселъс Сигнал нашрига ва Сурияда барқарорлик мавжуд бўлса, суриялик шифокорларнинг 80 фоизи кейинги 3-5 йил ичида қайтиши мумкинлигини айтди. .

Германия соғлиқни сақлаш вазири Карл Лаутербах суриялик шифокорларни соғлиқни сақлаш тизими учун «ажралмас» деб атади. «Улар тўлиқ интеграциялашган ва асосий роль ўйнайди», деди у ва қочқинларни депортация қилиш бўйича сиёсий чақириқлар ноаниқлик муҳитини яратишини таъкидлади.

2025 йилги сайловлар олдидан миграцияга оид баҳслар кучайиб бораётган бир пайтда суриялик шифокорларнинг қайтиши масаласи кескинлашмоқда. Ангела Меркелнинг 2015 йилда бир миллиондан ортиқ қочқинни қабул қилиш қарори ортидан Германия ҳам 1,2 миллион Украина фуқаросига бошпана берган.

Ўта ўнг партияларнинг сурияликларни ватанига қайтариш ҳақидаги чақириқлари кучайиб бораётганига қарамай, иш берувчилар ва касаба уюшмалари мамлакатдаги ишчи кучи танқислигини бартараф этиш учун муҳожирлар зарурлигини таъкидламоқда.

Бироқ, Алхашрум каби кўплаб шифокорлар ватанга қайтиш орзуларини яширишмайди. «Ҳар куни мен Сурияга оилам олдига қайтишни тасаввур қиламан», деди у.