Францияда коронавирус билан касалланиш ярим миллиондан ошди
Франция расмийларининг 25 сентябрь куни берган маълумотларига кўра, мамлакатда коронавирусга чалинганлар сони ярим миллиондан ошиб кетди. Жума кунининг ўзида 15 797 кишининг бу касалликни юқтириб олгани аниқланган.
Соғлиқни сақлаш вазирлиги ҳозиргача Францияда жами бўлиб 513 034 киши CОVID-19 билан касалланганини маълум қилган. Бу билан Франция дунёдаги коронавирус ҳолатлари ярим миллиондан ошган 11 мамлакат қаторига қўшилди. Ҳозирда жаҳонда коронавирус билан касалланиш ҳолатлари энг кўп қайд этилган мамлакат АҚШ бўлиб, бу ерда CОVID-19 ни юқтириб олганлар сони 7 миллиондан ошган.
Францияда коронавируснинг иккинчи тўлқини бошлангани расман эълон қилинган. Айни пайтда мамлакатдаги катталиги жиҳатдан иккинчи шаҳар бўлган Марсель иккинчи тўлқиннинг авж олган нуқтаси бўлиб турибди. Шунинг учун бу шаҳарда чекловлар кучайтирилган. Жума куни эрталаб Марсель аҳолиси намойишлар уюштириб, ҳукуматдан бар ва ресторанларнинг ёпилиши ҳақидаги қарорни бекор қилишни талаб қилишди.
Францияда сўнгги икки ҳафта ичида 150 мингга яқин кишининг коронавирусга чалингани аниқланган. Баҳордаги икки ой давом этган қатъий карантин даврида ҳам бундан озроқ касал қайд этилган бўлиб, ўшанда 132 мингдан ортиқроқ одамга коронавирус ташхиси қўйилганди.
Шунингдек, 25 сентябрь куни Францияда яна 150 киши коронавирус сабаб оламдан ўтди ва қурбонларнинг умумий сони 31 661 кишига етди.
