Эрон телеканалида Трампга суиқасд билан таҳдид қилинди. Унинг жавоби: “Агар шундай бўлса, бутун мамлакат ҳавога учади!”

Жаҳон иқтисодий форумида иштирок этиш учун Давосга учишидан бироз олдин АҚШ президенти Доналд Трамп, агар мулла режими ва уларнинг тарафдорлари унга суиқасд қилишга уринса, қандай чоралар кўришини очиқ айтди.

«Улар бундай қилмагани маъқул. Аммо мен шундай топшириқ берганман: агар қачондир бирор нарса содир бўлса, бутун мамлакат ҳавога учади», — деди Трамп NewsNation телеканалига берган интервьюсида. Ушбу суҳбат олдиндан ёзиб олинган «Katie Pavlich Tonight» дастурида 23 январь куни (маҳаллий вақт билан) эфирга узатилди.

Шундан сўнг Трамп ўзидан аввалги президент Жо Байденни Эрон таҳдидларига етарлича қатъий жавоб бермаганликда айблади ва Теҳронга яна бир бор огоҳлантириш йўллади:
«Мен жуда аниқ кўрсатмалар берганман: агар нимадир содир бўлса, улар ер юзидан йўқ бўлиб кетади».

Трампнинг кескин баёнотлари ўтган ҳафта ўртасида Эрон давлат телеканалида намойиш этилган лавҳадан кейин янгради. Унда Доналд Трамп 2024 йилда Пенсильвания штатидаги Батлер шаҳрида бўлиб ўтган сайловолди тадбирида унга уюштирилган суиқасддан сўнг Махфий хизмат агентлари қуршовида тасвирланган. Экранда эса таҳдидли ёзув пайдо бўлган:
«Бу сафар [ўқ] нишондан четга чиқмайди».

Бу ҳолат сўнгги кунларда мамлакат ичида минглаб намойишчиларни қатл этган Эрон режими билан АҚШ президенти ўртасидаги навбатдаги кескинлашув сифатида баҳоланмоқда. Бир неча кун аввал Эроннинг олий раҳбари Оятуллоҳ Али Хоманай Трампни «жиноятчи» деб атаб, Эрондаги норозилик намойишларини уюштиришда шахсан уни айблаган эди.

Бунга жавобан Трамп кескин танқид билан чиқиб, Politico журналига берган интервьюсида бош муллани «руҳий жиҳатдан носоғлом одам» деб атади.
«Эрон учун янги раҳбарият излаш вақти келди», — дея қўшимча қилди АҚШ президенти.

Сўнгги ҳафталарда Трамп АҚШ намойишчиларга ёрдам бериш мақсадида ҳарбий аралашувга ҳам тайёр эканини бир неча бор таъкидлаб келмоқда. Эрон Қуролли кучлари вакили, генерал Абольфазл Шекарчи 20 январь куни шундай деди:
«Трамп шунга ишонч ҳосил қилсинки: агар тажовуз қўли етакчимизга узатилса, биз нафақат ўша қўлни кесиб ташлаймиз, балки уларнинг бутун дунёсини ёқиб юборамиз».