CCВ: Республика кардиология марказида ташхис усуллари 292 тага етказилди

Ўтган йил Республика ихтисослаштирилган кардиология илмий-амалий тиббиёт маркази учун анча самарали бўлди. Буни йил мобайнида муассасада янги диагностика ва даволаш усуллари йўлга қўйилгани, бир қатор ноёб жарроҳлик амалиётлари муваффақиятли ўтказилгани ҳам тасдиқлаб турибди.

Жамоа ютуқларида, албатта, юртимизда тиббиётни халққа яқинлаштириш мақсадида олиб борилаётган эзгу саъй-ҳаракатлар ва марказнинг ривожланган давлатлардаги етакчи клиникалар билан ҳамкорлиги муҳим омил бўлаётир.

— Мамлакатимизда тиббиётга катта эътибор қаратилмоқда, — дейди муассаса директори Хуршид Фозилов. — Натижа эса шунга яраша бўляпти. Ўзимиздан келиб чиқиб айтадиган бўлсак, 2024 йилда марказимизда 12 та янги диагностика ва 15 та даволаш усули жорий этилиб, аҳолига кенг қулайликлар яратилди.

Бугунги кунга келиб, марказимизда қўлланилаётган ташхис усуллари сони 292 тага, даволаш усуллари эса 115 тага етди. Шуларга мос ҳолда марказимизнинг ўзида салкам 3 минг 100 та операция ўтказилган бўлиб, шундан 90 фоизи юқори технологик амалиётлар эканлиги эътиборга молик.

Ўтган йилдаги ёрқин ютуқларимиздан яна бири — юрак нуқсонидан азият чекаётган беморларда 3D эндоскопик усулда мураккаб жарроҳлик амалиёти ўзлаштирилгани бўлди.

Ана шу ютуғимиз Президентимизнинг соҳа ходимларига йўллаган байрам табригида алоҳида эътироф этилгани эса бизга фахр-ифтихор бағишлаши билан бирга, зиммамиздаги масъулиятни янада оширади.

Йил давомида хорижлик мутахассислар билан ҳамкорликда бир қатор ноёб жарроҳлик амалиётлари ўтказдик.

Мисол тариқасида Германия хирургия маркази интервенцион аритмологи Алексей Сиганов билан биргаликда катетерли криоаблация амалиёти муваффақият билан амалга оширилганлигини келтириш мумкин.

АҚШ, Россия ва Туркия давлатларининг тиббиёт ташкилотлари билан 4 та ҳамкорлик меморандуми имзоланган бўлиб, шу асосда ўзаро тажриба алмашиш йўлга қўйилган.

Биргина ўтган йилнинг ўзида 40 нафардан зиёд марказ мутахассислари, илмий ходимлари Германия ва Россиядаги нуфузли тиббиёт муассасаларида малака ошириб келди.

Марказнинг тиббиётни халққа яқинлаштириш йўналишидаги фаолияти ҳам яхши йўлга қўйилган. Шу мақсадда ҳудудий филиалларда ўтган йилда 68 та янги диагностика ҳамда 81 та даволаш усулларини жорий этдик.

Тошкент вилоятининг Бекобод шаҳрида коронар агиография текшируви ва стентлаш амалиёти ўзлаштирилди. Қолаверса, жойларда маҳаллий шифокорлар билан биргаликда кўплаб қўшма операциялар ўтказилди.

Асосий ютуғимиз сифатида ҳудудларга қаратилаётган катта эътибор туфайли аҳолининг марказимизга мурожаати деярли 30 фоизга камайганлигини келтирса бўлади.

Айни чоғда жамоамиз истиқболдаги вазифаларни муваффақият билан бажариб, ютуқлар салмоғини янада ошириш ниятида меҳнат қилмоқда.