Британия тажрибаси: Дунёда илк бор вакцина синовида иштирок этувчиларга атайлаб коронавирус юқтирилади

Британияда коронавирусга қарши вакцина синовларида иштирок этувчи кўнгиллиларга атайлаб вирус юқтирилади.

Таъкидланишича, кўнгиллиларга дастлаб вакцина, бир ойдан кейин эса уларда коронавирус инфекциясини келтириб чиқарувчи миқдорда вирус киритилади. Бу тадқиқотлар Лондондаги хавфсиз карантин муассасасида 2021 йил январида бошланиши мумкин. Ҳозирдаёқ синовларда иштирок этиш истагини 2 мингга яқин киши билдирган.

Лойиҳанинг илмий томонига Лондон Империя коллежи ва hVIVO компанияси масъул бўлади. 

Бу синовлар вакцина самарадорлигини баҳолаш учун соғлом иштирокчилар атайлаб коронавирусга учратиладиган дунёдаги илк шундай синовлар бўлади.

Айни вақтда Британияда вакцинани ишлаб чиқиш устида иккита илмий марказ шуғулланмоқда. Оксфорд университети олимлари вакцинани сентябргача, Imperial College олимлари эса 2021 йил баҳоригача олишлари мумкинлигини айтишган.

Эмлашдан кейин вакцинанинг самарадорлигини реал касалликлар билан синаш бир неча асрлар давомида ўтказиб келинади. Мисол учун, 1976 йилда вакциналар ишлаб чиқиш бўйича етакчи олим Эдвард Женнер 8 ёшли болага одам учун хавфли бўлмаган сигир чечагини юқтирган ва кейинроқ унда ҳосил бўлган иммунитетни ҳақиқий ва хавфли чечак билан синаган. Шунингдек, ич терлама, вабо, безгак, грипп ва бошқа инфекцияларга қарши вакциналарни синашда шундай усулдан фойдаланилган.  

Хусусан, hVivo компанияси томонидан ташкиллаштирган гриппга қарши вакцина синовлари вақтида кўнгиллиларга 3750 фунт стерлинг (4775 доллар) тўланган. Бироқ коронавирус учун кўпроқ ҳақ тўланиши мумкин, чунки карантин узоқроқ – бир ойгача давом этиши эҳтимоли бор.