Британия “Brexit”дан кейин биринчи санкцияларини киритди

Европа Иттифоқи Россияга қарши санкцияларни кенгайтирганидан кўп ўтмай, Буюк Британия ўзининг “Магнитский рўйхати” (бутун дунё бўйлаб инсон ҳуқуқларини қўпол равишда бузувчиларга қарши  санкциялар рўйхати)ни эълон қилди.

Унга қуйидагилар киритилди:

1. Россия Федератсиясининг солиқ хизмати ходимлари ва Россия Федерацияси Ички ишлар вазирлигининг юқори лавозимли ходимларининг коррупция тармоғини фош қилган аудитор Сергей Магнитскийнинг ўлимида иштирок этган 25 та Россия фуқароси;

2. 2018 йилда Туркияда журналист Жамол Хашоггининг ўлдирилишида иштирок этган 20 та Саудия фуқароси;

3. Роҳинжа қочқинларига қарши қатағонлар туфайли Мянмадан икки генерал;

4. Шимолий Кореяда мажбурий меҳнат, қийноқ ва қотилликлар билан шуғулланувчи иккита ташкилот.

Қайд этилишича, Британия қора рўйхатига кирган шахслар мамлакатга киришлари, қироллик банклари хизматларидан фойдаланишлари ёки Британия иқтисодиётидан фойда олишлари мумкин эмас.

Таъкидланишича, бу Лондоннинг биринчи санкциялар тўлқини бўлиб, кейингиси яқин ойларда бўлиши кутилмоқда.