Божхона тўловларидан қочишга бўлган уринишларнинг олди олинди
Товар-моддий бойликларни ноқонуний йўллар билан олиб кириш орқали давлат бюджетига ундириладиган божхона тўловларидан қочишга уринган сохта ишбилармонларнинг қинғир хатти-ҳаракатларига ўз вақтида чек қўйилмоқда.
Жумладан, Тошкент шаҳар божхона бошқармасига қарашли божхона постларида бир қатор божхона қонунбузилиши ҳолатлари фош этилди.
“Аркбулоқ” божхона постида хориждан келтирилган транспорт воситасига ортилган юклар божхона кўригидан ўтказилганида, транспорт воситаси юкхонасида юк ҳужжатларида умуман қайд этилмаган қиймати 2,2 млрд. сўмлик 1000 дона мобил тўлов терминаллари борлиги аниқланди.
Натижада, давлат бюджетига салкам 532 млн. сўмлик божхона тўловларининг ундирилмай қолишининг олди олинди.
“Чуқурсой” ташқи иқтисодий фаолият божхона пости ходимлари томонидан пойтахтимизда фаолият юритувчи жамиятлардан бирининг номига келтирилган “трансформатор”лар божхона пости ходимлари томонидан белгиланган тартибда божхона кўригидан ўтказилди.
Ўтказилган текширувлар натижасида қиймати 1,1 млрд. сўмлик трансформаторларнинг юк ҳужжатларида, ёрлиқларида 2023 йилда ишлаб чиқарилган дея кўрсатилган бўлсада, аслида муқаддам фойдаланишда бўлганлиги, унинг қисмларида еса “1984 йилда ишлаб чиқарилган” ёзувлари мавжудлиги, трансформатор ёрлиқлари еса қайта бўялганлиги аниқланди.
Навбатдаги ҳолатда Контрабандага қарши курашиш бўлими ва “Чуқурсой” божхона пости ходимлари томонидан хориждан келтирилган юк контейнери кўздан кечирилганида, 635 млн. сўмлик 5 284 дона “авто улов ўриндиқлари учун махсус ғилофлар” товарлари йўл юк кузатув ҳужжатларида кўрсатилмаганлиги маълум бўлди.
“Тошкент-товар” божхона постида аниқланган ҳолатда маъсулияти чекланган жамиятлардан бирининг номига келтирилган мато товарлари божхона кўригидан ўтказилиши натижасида, божхона юк декларацияси ҳамда юк ҳужжатларида қайд этилмаган 597 млн. сўмлик матолар борлиги аниқланди.
Ҳозирда юқоридаги барча ҳолатлар юзасидан суриштирув ва текширув ҳаракатлари олиб борилмоқда.
Тошкент шаҳар божхона бошқармаси Ахборот хизмати
