Беларусда Россиянинг ядро қуроли бўйича ҳужжатлар имзоланди
Россия ўзининг ядровий қуролини (ЯҚ) Беларусда жойлаштириш бўйича режаларини амалга оширмоқда. 25 май, пайшанба куни икки давлат мудофаа вазирлари Сергей Шойгу ва Виктор Хренин Минскда «Россиянинг стратегик бўлмаган ядро қуролларини Беларус Республикаси ҳудудидаги махсус омборда сақлаш тартибини белгиловчи ҳужжатларни» имзоладилар, деб хабар беради Беларус Мудофаа вазирлиги.
Шойгунинг сўзларига кўра, Россия ва Беларус томонидан амалга оширилаётган чора-тадбирлар «барча мавжуд халқаро-ҳуқуқий мажбуриятларга мос келади». Унинг таъкидлашича, Россия Беларус ҳудудида стратегик бўлмаган ядро қуролларини жойлаштирган ҳолда, уларни Минскка ўтказмайди, ядровий қуроллар устидан назорат ва улардан фойдаланиш бўйича қарор Москвада қолади.
Бундан ташқари, вазирлар ўз идоралари ўртасидаги «ҳарбий-сиёсий вазият ва ҳарбий-техник ҳамкорлик масалаларини муҳокама қилдилар». Сергей Шойгу Ғарбни Россия ва Беларусга қарши «эълон қилинмаган» уруш олиб бораётганликда айблади.
25 март куни Россия президенти Владимир Путин Минск илтимосига биноан Россия ўзининг тактик ядро қуролини (ТЯҚ) Беларусда жойлаштиришини маълум қилди ва Қўшма Штатлар узоқ вақтдан бери иттифоқдош давлатлар ҳудудида ҳам худди шундай йўл тутиб келаётганини таъкидлади. Беларусда ТЯҚ учун сақлаш омбори қурилиши 1 июлга қадар якунланиши режалаштирилган.
Москва Минскка ядровий қурол ташувчиси бўла оладиган «Искандар» ракета тизимини аллақачон топширган ва Беларус самолётларини махсус ўқ-дорилардан фойдаланиш учун қайта жиҳозлашда ёрдам берган. Беларус ҳарбий хизматчилари Россияда тегишли тайёргарликдан ўтган.
