«Бахти Ташкентский»нинг ўғли: «Отамнинг йўлидан бориш ҳақидаги хаёлларим катта хато экан»

«Бахти Ташкентский» номи билан танилган Бахтиёр Қудратуллаевнинг ўғли Бекзод Зафаров отасининг йўлини давом эттириш ҳақидаги ўйлари катта хато бўлгани ҳамда жиноят оламига интилиш ҳеч қандай фойда келтирмаслигини таъкидлади. У бу ҳақда Ички ишлар вазирлиги эълон қилган «Сўнгги пушаймон» кўрсатувига сўзлаб берди, деб ёзмоқда Газета.

Бекзод Бахтиярович Зафаров уюшган жиноий гуруҳдаги ноқонуний ишлари учун Жиноят кодексининг 165-моддаси 3-қисми «в» банди (Уюшган гуруҳ томонидан ёки унинг манфаатларини кўзлаб товламачилик) ҳамда 168-моддаси 4-қисми «в» банди (Уюшган гуруҳ томонидан ёки унинг манфаатларини кўзлаб фирибгарлик) билан айбли деб топилиб, 11 йилга озодликдан маҳрум этилганди.

«Қамалишимдан олдин отамнинг йўналишларини ушлайман, [маслагини] эгаллайман деган хаёлларда юрган эдим. Ўйлаганларимнинг ҳаммаси катта хато экан», — деди у. Ҳозирда колонияда пайвандчилик ва хўжалик ишлари билан шуғулланаётган Зафаров озодликдаги оддий ҳаётнинг қадрини энди тушуниб етганини айтади. Унинг сўзларига кўра, жиноят оламига интилиш ҳеч қандай фойда келтирмайди.

«Бир йил олдинги ҳаётим билан ҳозирги ҳаётим анча фарқли. Бу ерда Бекзодмисан, ё Бекмисан, ким бўлсанг ҳам, ҳамма учун қонун бир. Жиноят оламининг таниқли шахсларига, умуман, жиноят оламига ҳеч ким фанат бўлиб эргашишга интилмасин. Бу нарсадан ҳеч қандай фойда йўқ. Эл-юрт, ота-онанинг хизматида бўлсин, маҳаллага, жамиятга фойдаси тегадиган инсон бўлсин. Шу нарсаларни тушуниб етдим», — дейди у.

Зафаров шахсий ҳаётидаги йўқотишлар ва фарзандлари олдидаги масъулиятга ҳам тўхталди. У ўғлининг мактабга бориши ва қизининг улғайиш жараёнида иштирок эта олмаётганини энг катта пушаймонлиги деб атади.

«Одам қамалиб бошига тушса, нималар йўқотганини тушунар экан. Икки фарзандим бор. Катта ўғлим кейинги йил мактабга чиқади. Дада, тезроқ келинг, сизни соғиндим, деди. Ўша гаплари ҳали ҳамон хаёлимдан кетмайди. Тунлари кўзларимни юмиб ётганимда болаларим ва оилам тушимга кириб чиқади. Қаттиқ пушаймонларимдан бири ўзимнинг мактабга чиқаётган пайтларимни эслаб, ҳозирги кунда ўғлимни биринчи синфга, биринчи қўнғироққа олиб чиқа олмаётганим, ота-оналар мажлисида иштирок эта олмаётганим, унга дарс-таълимларида қарашмаётганимдир. Улар ҳаётга энди қадам босяпти. Шуларга бир яхши ўрнак бўлиб, олдида суянадиган тоғи бўла олмаётганим алам қилади. Шу нарсалардан афсусдаман. Қизимнинг тили чиқиб, ҳар хил сўзлари пайдо бўлаётган пайтини кўра олмаяпман. Шу нарсаларни ўтказиб юборяпман. Оила муқаддас, оилада ажралиш, ҳамма нарсага одамнинг ўзи сабабчи, ўзи айбдор бўлар экан. Ҳозир кимнидир айблаб ўтиришим хато. Айб ўзимда», — дейди у.

Бекзод Зафаров агар вақтни орқага қайтариш имкони бўлганида, ҳалол меҳнат қилиб, оиласи билан яшашни исташини, қилган ишлари учун жазо муқаррарлигини англаб етганини таъкидлади.

«Нотўғри ишлар қилган эканман. Битта касб, битта яхши ҳунар ўрганиб, эл-юртга фойдам тегадиган иш қилишим керак эди. Оиламнинг бағрида бўлганим минг марта афзалроқ эди. Онам шунча йўл босиб, мени кўргани келяптилар. Ўзи едирмай, ичирмай, не умидларда катта қилгандилару, натижаси нима бўлганига минг пушаймонман. Қанийди вақтни орқага қайтаришнинг иложи бўлганида, ҳалол юриб, ҳалол меҳнат қилиб, оила бағрида бўлишни жуда истардим. Чучварани хом санаган эканман, ҳамма нарсага жазо муқаррар экан. Ҳар бир Ўзбекистон фуқароси қонунни билиб, ўшанга амал қилиб яшаш керак экан», — деди у.

Маҳкум қилмиши учун пушаймонлик билдириб, яқинлари, шунингдек, давлат раҳбаридан узр сўради.

«Ҳибсхонада, мана, икки йилдан ошиқ ўтирибман. Шуни тушуниб етдимки, ҳибсхонада ош еб, идиш-товоқларингиз тилладан бўлгандан кўра, кўчада оила даврасида бир бурда нон еб юрганингиз минг марта афзалроқ экан. Кўчадан, ташқаридан бу нарса чиройли кўринадию, лекин ичига кирганингиздан кейин, минг афсус, кеч бўлар экан. Шунинг учун минг пушаймонман. Авваламбор, ота-онамдан, қариндошларимдан, маҳалламдан, оиламдан, муҳтарам президентимиздан, ҳаммадан узр сўрайман. Қилган ишимдан чин кўнглимдан пушаймонман», — деди «Бахти Ташкентский»нинг ўғли.

«Ёшларга ҳозирги кунда берадиган маслаҳатим, келажакда улар тўғри юрса, шу — пойдевор бизга. Уларга маслаҳатим, иложи борича ота-онанинг дуосини олиб, эл-юртда, маҳалла-кўй хизматида бўлиб, яхши касб-ҳунарларнинг эгаси бўлиб, тиллар ўрганиб, ҳар хил давлатлар билан, ташкилотлар билан ҳамкорликда ишлаб, яхши тараф билан Ўзбекистон байроғини кўтариб, ҳаммага танитиб, спорт билан шуғуллансин, хомхаёл қилмасдан, ҳамма нарсани қадрлашсин», — дейди маҳбус.