АҚШ «Олтин гумбаз»и учун 70 тадан ортиқ ракета кузатувчи сотиб олади

АҚШ президенти Дональд Трампнинг «Олтин гумбаз» ракетага қарши мудофаа (РҚМ) лойиҳасини амалга ошириш доирасида ракеталарни кузатувчи сунъий йўлдошлар учун 3,5 миллиард доллар ажратилди. Космик ишланмалар агентлиги 72 та қурилмани етказиб бериш бўйича тўртта мудофаа компанияси билан шартнома имзолаган. Ушбу космик аппаратлар ракеталарни кузатиб боради ва улар ҳақида олдиндан огоҳлантирувчи вазифасини ўтайди.

Bloomberg бундай буюртмаларнинг учинчи транши ҳақидаги эълонга таяниб, АҚШ Космик ишланмалар агентлиги «Олтин гумбаз» лойиҳаси учун сунъий йўлдошлар етказиб берувчи тўртта мудофаа компанияси билан келишувга эришганини хабар қилди.

Тахминан 72 та сунъий йўлдошни етказиб бериш бўйича шартномаларни Lockheed Martin, Northrop Grumman, L3Harris Technologies ҳарбий-саноат компаниялари ҳамда хусусий ишлаб чиқарувчи Rocket Lab USA қўлга киритди.

Унга кўра:

• Lockheed Martin— 1,1 миллиард долларлик;
• L3Harris Technologies— 843 миллион долларлик;
• Rocket Lab— 805 миллион долларлик;
• Northrop Grumman— 764 миллион долларлик шартнома имзолади. Уларнинг ҳар бири 18 тадан сунъий йўлдош етказиб беради.

Нашрнинг аниқлик киритишича, ушбу аппаратлар ракеталарни кузатиш ва хавф ҳақида огоҳлантириш орқали АҚШнинг эҳтимолий таҳдидларни аниқлаш қобилиятини оширади.

Маълумот учун, «Олтин гумбаз» АҚШни ташқи ҳужумлардан ҳимоя қилиш учун кўп босқичли РҚМ архитектурасини назарда тутади. Тизим ракета учирилишини реал вақт режимида аниқлайдиган кузатув ва таниш сунъий йўлдошлари гуруҳидан иборат бўлиб, у ракеталарни парвознинг барча босқичларида тутиб олади. Лойиҳани 2029 йил январида ишга тушириш режалаштирилган. Трампнинг таъкидлашича, мақсад — Хитой ва Россиядан келаётган таҳдидларга қарши туришдир.

Ноябрь ойи охирида Reuters манбаларга таяниб, лойиҳани амалга оширишда кечикишлар бўлаётгани ҳақида хабар берган эди. Бунга 43 кунлик «шатдаун» (ҳукумат ишининг тўхтаб қолиши) сабаб бўлиб, у ходимларни ишга ёллаш ва дастур ижросини секинлаштирган. Шунингдек, ёзда лойиҳа учун ажратилган дастлабки 25 миллиард долларни сарфлаш бўйича аниқ режанинг йўқлиги ҳам халақит берган.

19 декабрь куни маълум бўлишича, Трамп АҚШ махсус хизматлари ва Пентагонга «Олтин гумбаз» дастурига мувофиқ ракетага қарши мудофаа технологияларини намойиш этишни буюрувчи фармонни имзолаган.