Ангренда кўприкнинг бир қисми қулаб тушиши оқибатида йўл вақтинча ёпилди

Ижтимоий тармоқларда Тошкент вилоятининг Ангрен шаҳрида жойлашган “Қорабоғсой“ кўпригининг қулаб тушганлиги ҳақида хабарлар тарқалди. Ҳолат бўйича Автомобиль йўллари қўмитаси маълумот берди.

Қайд этилишича, ҳолат бўйича “Ўзйўлкўприк“ кластерининг Кўприк ва сунъий иншоотларни диагностика қилиш бўлими мутахассислари томонидан Автомобиль йўллари қўмитасининг мурожаатига асосан қисқа муддатда мазкур кўприкда ўрганиш ишларини амалга ошириб, тегишли хулосани тақдим этди.

Унга кўра, кўприк конструкцияси техник ҳолати ўрганилганда оралиқ қурилма тўсинларининг маънавий эскиргани, тўсинларнинг амалдаги юкламаларни кўтара олмаслиги, кўприк устки қопламаси қалинлиги меъёридан ортиб тўсинларга ортиқча юк бераётганлиги, тўсинлар ўзаро яхлит бўлмай, алоҳида элемент сифатида ишлаётганлиги ҳамда кўприк устки қопламасидаги ёриқлардан ва қатнов қисми қопламасининг чекка қисмларидан оқиб тушган сувлар тўсинларни бутун танаси бўйлаб тарқалиб, коррозияга учратаётганлиги, тўсинлардаги ёриқлардан сув сизиб кириб ишчи арматураларини ҳам коррозияга учратаётганлиги аниқланди.

Кўприкнинг умумий техник ҳолати қониқарсиз ҳолатда дея баҳоланади ва келгусида содир бўлиши мумкин бўлган авария ҳолатларининг олдини олиш мақсадида кўприкда тўлиқ реконструкция ишларини олиб бориш лозимлиги, кўприк жойлашган автомобиль йўли I тоифага тўғри келганлиги, кўприк габарити автомобиль йўлига мос эмаслиги, автомобиллар ҳаракатида айнан кўприк жойлашган оралиқда тирбандликлар ҳосил бўлаётганлигини инобатга олиб, кўприк реконструкция ишлари доирасида автомобиль йўли тоифасига ва замонавий А 14, НК 100 меъёрий талабларга мос бўлган янги кўприкни қуриш мақсадга мувофиқлиги айтиб ўтилган.

Қўмитанинг қўшимча қилишича, 2025 йил 13 май куни тахминан соат 20:00 да, А 373 “Тошкент-Оҳангарон- Ангрен-Қўқон-Шаҳрихон-Андижон“ автомобиль йўлининг 85-километридаги “Қорабоғсой“ кўприги четидаги охирги оралиқ қурилмаси, яъни пиёдалар йўлаги (бир бона оралиқ қурилма балка 22.1 м) синиши оқибатида ушбу йўналиш бўйича автомобиллар ҳаракати вақтинча чекланиб, ҳаракатланиш вақтинча Д 019 “Ангрен шаҳрини айланиб ўтиш“ автомобиль йўлига ўтказилган.

Маълумот учун, А 373 “Тошкент-Оҳангарон-Ангрен-Қўқон-Шаҳрихон-Андижон“ автомобиль йўлининг 85-километрида жойлашган 2Қорабоғсой“ кўприги 1969 йилда “МСУ-14 трест УЗ мостстрой“ томонидан қуриб фойдаланишга топширилган ва 1995 йилда реконструкция қилинган. Кўприк уч оралиқли схемаси 3х22.2 м улукли схемада II тоифали автомобиль йўлига мўлжалланиб қурилган, умумий узунлиги 66.6 метр, кўприкнинг оралиқ қурилмалар кенглиги 1.6 м, узунлиги 22.2 м, габарита 1.3+0.30+14.05+0.30.+1.3 м кўприкнинг баландлиги 4.80 метр, қатнов қисмининг кенглиги 2*6.55 м, тротуар кенглиги 2*1.30 м, ажратувчи тасмалар кенглиги 0.96 м, кўприк ости ўтиш габарит баландлиги 4.80 м, қатнов қисми қиялиги бўлама-1%, кўндаланг-3%, меъёрий юклама Н-30 т, НК-80 т, автомобиль йўли 16-тоифага мансуб.