35 381 нафар фуқаро хорижда ишга жойлаштирилган — Ташқи меҳнат миграцияси агентлиги

Бугун Ташқи меҳнат миграцияси агентлиги тизимида мурожаатлар билан ишлаш ва муаммоларни ҳал қилиш бўйича олиб борилаётган ишлар юзасидан брифинг бўлиб ўтди.

Агентилик ахборот хизмати раҳбари Ортиқхўжа Норов қайд этишича, жорий йилнинг 10 ойи давомида жисмоний ва юридик шахслардан келиб тушган жами 85 634 мурожаатнинг 66 069 таси хорижий давлатга ишлагани кетиш, 18 282 таси чет элда қийин аҳволга тушганда ҳуқуқий, моддий ва ижтимоий ёрдам олиш, қолганлари меҳнат миграцияси билан боғлиқ бошқа масалаларга тегишли.

Ўтган йилнинг 10 ойи давомида 178 мингдан ортиқ мурожаат кўрилгани инобатга олинса, жорий йил бу кўрсаткич 48 фоиз камайганини англаш мумкин.

Хорижда ишлаш истагида бўлган юртдошларимизнинг 35 381 нафарига ташкилий ва манзилли тарзда ишга жойлашишга кўмаклашилган. Чет давлатда ишлаётган 8 667 фуқаромизга ҳуқуқий, 7 141 кишига ижтимоий ва 2 474 нафар мурожаат қилган шахсга жами 71 400 доллар миқдорида моддий ёрдам кўрсатилган.

Хорижда қийин аҳволда қолган 76 нафар юртдошимиз вақтинча хостелга жойлаштирилган, 443 ҳамюртимиз Ватанга қайтарилган. 1710 кишининг иш берувчи томонидан тўланмаётган иш ҳақи, 98 нафарининг эса компенсация тўлови шаклидаги жами 1 миллион 200 минг доллар пули ундириб берилган.

Бундан ташқари, Бандлик органлари билан бирга хорижда ишлаш истагини билдирган 49 047 фуқаро касб-ҳунар ва чет тили ўрганиш учун ўқишга жалб қилинган. Уларнинг 28 717 нафари хорижий иш берувчилар танловига жалб қилинмоқда.

Хорижда ишлаётган ёки чет элда ишлаш истаги бўлган фуқаролар 24 соат узлуксиз ишлаши йўлга қўйилган “1282” қисқа рақами, иш вақти давомида ишлайдиган 71-200-00-61 телефон рақами ҳамда “Labour Migration” дастурий мажмуаси орқали онлайн мурожаат қилиши мумкин.