15 ёшли қиз Болалар омбудсмани ёрдамида руҳий-асаб касалликлар диспансеридан чиқарилди

Болалар омбудсманига Бухоро вилояти Руҳий-асаб касалликлари диспансери маъмуриятидан мурожаат келиб тушди.

📃 Мурожаатда 2009 йилда туғилган М.Я. (қиз бола) руҳий-асаб касалликлар диспансерига жойлаштирилгани, лекин бугунги кунда у фаол даволанишга муҳтож эмаслиги, ҳозирда М.Я. дан ҳеч ким хабар олмаслиги, онаси билан телефон орқали гаплашилганда у қизини олиб кетолмаслиги баён қилинган.

❕Болалар омбудсмани вояга етмаган М.Я. оиласининг ижтимоий вазияти баҳоланиши ва унинг шифохонадан чиқарилиб, соғлом ҳаётга мослашуви юзасидан Ижтимоий ҳимоя миллий агентлигига сўров юборди.

Агентлик томонидан мазкур ҳолат атрофлича ўрганилди.

Жумладан, Агентликнинг Бухоро вилояти ҳудудий бошқармаси томонидан вояга етмаган М.Я. нинг онаси Я.М. билан учрашилиб, тушунтириш ишлари олиб борилди. Натижада, фарзанди М.Я. жорий йилнинг 19 март куни Бухоро вилояти руҳий-асаб касалликлари диспансеридан чиқарилиб, яшаш манзилига олиб кетилди.

✔️ Бундан ташқари, М.Я. ҳозирда ўқишини Бухоро шаҳридаги 8-сонли умумий ўрта мактабда давом эттира бошлади.