1 февралдан Ўзбекистондан Афғонистонга темир йўл қатнови вақтинча тўхтатилади
Ғалаба – Ҳайратон темир йўли бўйлаб юк юборувчи тадбиркорлар диққатига!
Аввал хабар берганимиздек, 2022 йил 26-30 декабрь кунлари Термиз шаҳрида ўтказилган музокаралар давомида 2023 йилнинг 1 февралига қадар Афғонистон ҳудудидаги техник ишларни босқичма-босқич Афғон темир йўллари ишчилари томонидан амалга оширилиши бўйича “Ҳаракатлар режаси” келишилган эди.
Шунингдек, учрашув давомида “Согдиана транс” ШК ва Афғон темир йўл бошқармаси ўртасида томонлар бажарадиган ишлар рўйхати икки томонлама келишилиб, жорий йилнинг 27 январига қадар янги шартнома имзоланишига келишилган ҳамда тегишли баённома имзоланган.
Афғонистон темир йўл бошқармаси келишилган чора-тадбирларни ўз вақтида амалга ошира олмаётканлиги сабабли, 1 февралдан бошлаб Афғонистонга темир йўл қатнови вақтинча тўхтатилиши маълум қилинган.
Ғалаба-Ҳайратон темир йўли қачон очилиши ҳақидаги маълумотлар маълум қилинади.
Эслатиб ўтамиз, Афғонистондаги Ҳайратон–Мозори Шариф темир йўли 2010 йилда қурилиб, 2011 йилдан бошлаб Ҳайратон –Мозори Шариф темир йўлининг барча хизматлари “Сўғдиёна Транс” ШК томонидан амалга оширилмоқда.
