Зеленский: "Ишончим комилки, Украина ва Грузия Европа Иттифоқининг бир қисмига айланадиган кун келади"

Швейцарияда бўлиб ўтаётган Глобал тинчлик саммити доирасида Украина президенти Владимир Зеленский Грузия раҳбари Саломе Зурабишвили билан учрашди.

Бу ҳақда у Х ижтимоий тармоғидаги саҳифасида маълум қилган.

"Ишончим комилки, Украина ва Грузия биргаликда Европа Иттифоқининг бир қисмига айланадиган кун келади", деди у.

Зеленский қайд этганидек, учрашувда икки томонлама ҳамкорлик ва икки давлат олдида турган хавфсизлик муаммолари муҳокама қилинди.

“Мен президент Зурабишвилига Украинанинг энергетика секторига қарши Россиянинг ҳаво террори ҳақида гапириб бердим. Шунингдек, Грузия президентига биз учун жуда муҳим бўлган тинчлик саммитидаги иштироки учун миннатдорчилик билдирдим”, — деб ёзган Зеленский.

Грузия оммавий ахборот воситаларининг қайд этишича, бу икки давлат раҳбарларининг Россия ва Украина ўртасида уруш бошланганидан бери биринчи тўғридан тўғри музокараларидир. “Грузия орзуси” партиясини Киевни етарлича қўллаб-қувватламагани учун кескин танқид қилган Зурабишвили сўнгги икки йил давомида Зеленский билан бир неча бор телефон орқали гаплашган ва халқаро форумлар доирасида учрашган, бироқ тўғридан тўғри учрашувлар бўлмаган.

Зурабишвили маъмуриятининг маълум қилишича, учрашувда Украина ташқи ишлар вазири Дмитрий Кулеба, Зеленский маъмурияти раҳбари Андрей Ермарк ва мамлакат бош вазири ўринбосари Юлия Свириденко ҳам иштирок этган.