Халқ таълими бўлими ходими жиноятга қўл урди
Ота-оналар фарзандларини етук инсон бўлишини истаб, мактаб муассасаларига ўқитиш учун юборишади. Ваҳоланки, ушбу муассасалар фаолиятини мувофиқлаштириш вазифаси юклатилган халқ таълими бўлими ходимлари томонидан жиноятга қўл урилиши мактабда таълим олаётган ўқувчиларнинг тарбиясига салбий таъсир ўтказмасдан қолмайди.
Хаққулов Жонибек Одилович(исм-шариф шартли) 2017 йил 7 ноябрдан 2019 йил май ойига қадар Хатирчи туман Халқ таълими бўлимининг таълим сифатини мониторинг қилиш бўлимида инспектор-методист вазифасида ишлаб келиб, аттестациядан ўтувчи педагог кадрлар рўйхатига ўзгартириш киритиш бўйича таклифлар бериш каби вазифаларни бажариш чоғида ғаразгўйлик ва паст мақсадларни кўзлаб, гўёки сохта ҳужжатлар билан туманнинг таълим кўрсаткичларини яхшилаш мақсадида аттестациядан ўта олмаган, шунингдек, тоифа сертификатининг амал қилиш муддати тугаганлиги сабабли тоифага эга бўлмаган ўқитувчилар номига сохталаштирилган ҳолда расмийлаштириш ҳаракатларини муассасадаги компьютер воситаси ва рангли принтери ёрдамида сертификат серия-рақами, унга қайд қилинадиган ўқитувчининг фан тури ва шахсига оид маълумотларини ўзгартириш йўли билан амалга ошириб, сохта сертификатларни тумандаги мактаб директорлари орқали иш ҳақини ҳисоблаш “УЗАСБО” электрон дастурига ҳамда мактаблардаги тарификация ҳужжатларига киритиб, сохта буйруқ чиқариш йўли билан тўловга тақдим этиши натижасида, жами 83 та умумтаълим мактабларининг 379 нафар аттестациядан ўтмаган ўқитувчиларига асоссиз равишда ортиқча тўловларга йўл қўйилиб, жами 132 млн. 263 минг 250 сўмлик жуда кўп миқдордаги бюджет маблағларини растрата қилиш йўли билан талон-торож қилиб, қонун билан қўриқланадиган давлат ва жамият манфаатларига жиддий зарар етказган.
Мазкур жиноят иши жиноят ишлари бўйича Нурота туман суди раиси З.Ибрагимов томонидан кўриб чиқилиб, Хаққулов Жонибек Одиловичга мансабдорлик ва моддий жавобгарлик лавозимларида ишлаш ҳуқуқидан маҳрум қилиб, ахлоқ тузатиш ишлари жазоси тайинланди.
Ж.Ҳаққулов томонидан жиноят йиллар давомида содир этилганлиги бу борада юқори турувчи органлар томонидан ўз вақтида назорат қилинмаганлиги, жиноят содир этилишига бамайлихотир қараб турилганлигидан далолат беради.
Ҳар бир соҳада ҳаққонийлик, чин кўнгилдан ишлаш, адолатлилик ҳукм сурмас экан, ушбу турдаги жиноятлар содир бўлаверади. Шу сабабли, ҳар бир ходим фаолиятини тизимли ва изчил назорат қилиш келажакда адолатли ва самарали ишлаш механизми яратилишида асос бўлим хизмат қилади.
Хуршид Асомов,
Жиноят ишлари бўйича
Нурота туман суди девонхона мудири
