Владимир Соловьевнинг Италиядаги бешинчи вилласи аниқланди

Пропагандачи Владимир Соловьевнинг Италиядаги бешинчи вилласини жамоатчиликдан яширишга урингани иш бермади. Россиялик телебошловчининг онаси номига сотиб олинган кўчмас мулки борлиги «Важние истории» нашри томонидан фош этилган. Нашр реестрдан кўчирма чоп этган.

Aлексей Навалнийнинг “Коррупцияга қарши кураш жамғармаси” суриштирувларидан маълум бўлишича, Соловьев иккита виллага тўлиқ эгалик қилади, яна биттаси эса онасининг номига ўтказилган. Бироқ, кейин маълум бўлишича, унинг онаси Ирина Соловьевага Италиядаги битта эмас, иккита вилла берилган, иккинчи вилла Комо кўли соҳилида жойлашган.

Украинада уруш бошланганидан сўнг, босқинни қўллаб-қувватлаган ушбу пропагандист Европа Иттифоқи, Буюк Британия, Канада, Швейцария, Aвстралия, Япония ва бошқа мамлакатларнинг санкцияларига дучор бўлди. 2022 йил март ойида Италия ҳукумати Комо кўли бўйидаги умумий қиймати 8 миллион евро бўлган иккита Соловьев вилласини ҳибсга олди.

Пропагандистнинг расмийлар томонидан ҳисобга олинмаган уйларини аниқлаган Навалний жамоаси Европа Иттифоқи санкцияларига риоя этилишини назорат қилувчи Италия Молиявий хавфсизлик қўмитасидан ушбу мулкни ҳам ҳибсга олишни сўради. Шунингдек, улар Соловьевлар оиласи аъзоларидан визалар ва истиқомат учун рухсатномаларни олиб қўйишни таклиф қилишди. 2019 йилда тарғиботчи ўзида ва фарзандларида бу ҳужжатлар борлигини айтганди. Бироқ, энди унга Европа Иттифоқининг барча мамлакатларига кириш тақиқланган.

Соловьев яқинда Европа расмийларини нацизм ва антисиметизмда айблади. "Бу фашист аблаҳларга айтадиган гапим йўқ. Улар шунчаки нацистлар. Энг аввал менга ўхшаган яҳудийларни Италиядаги мулкидан маҳрум қилишади. Европалик нацистлар биз яҳудийларни биринчи марта мулкимиздан маҳрум қилишаётгани йўқ”, деган Кремлнинг бош пропагандисти.