Ўзбекистонда маданий туризм: анъаналар ва мерослар уйғунлиги
Саудия Арабистонининг "Swift News" электрон нашрида "Ўзбекистонда маданий туризм: анъаналар ва мерослар уйғунлиги" сарлавҳали мақола жойлаштирилди, деб хабар қилмоқда "Дунё" АА мухбири.
Нашрда таъкидланишича, бой тарих ва бой маданиятга эга Ўзбекистон маданий туризм хазинаси ҳисобланади. Қадимий Самарқанд ва Бухоро шаҳарларидан тортиб, Тошкентнинг гавжум бозорларигача Ўзбекистон эски ва янги, анъана ва инновациянинг ўзига хос уйғунлигини таклиф этади.
"Тошкент, Самарқанд, Бухоро, Шаҳрисабз, Хива, Урганч, Термиз, Қорақалпоғистоннинг қадимий тарихий ёдгорликлари Ўзбекистонда тарихий-маърифий туризмнинг асосини ташкил этади, – дейилади мақолада. – Ўзига хос меъморчилик ва маданий меросга эга бўлган бу шаҳарлар мамлакатнинг бой тарихидан далолатдир".
Ўзбекистондаги маданий туризм нафақат ташриф буюрувчиларга мамлакатнинг бой маданий мероси билан танишиш имконини беради, балки қишлоқ ҳаётидан завқланиш ва иштирок этиш имконини беради.
"Катта Лангар Ўзбекистондаги тарихий ва маданий тажрибаларни ўзида мужассам этган ноёб мажмуадир. Бу ерда ноёб ёдгорлик мажмуаси мавжуд. Қишлоқ тарихи 15-аср охирларга бориб тақалади", – дея қайд этилган материалда.
Манбада Сурхондарё вилоятидаги Ғилон қишлоғи ҳақидаги маълумотлар ҳам ўрин олган. Қайд этилишича, мазкур қишлоқ ўзига хос ва ўзига муносиб туризм тажрибасини тақдим этади.
"Ғилонга ташриф буюрувчилар маҳаллий маданият ва турмуш тарзи, жумладан, анъанавий деҳқончилик усуллари, ҳунармандчилик ва ошхона билан танишишлари мумкин. Маҳаллий оилаларга қарашли меҳмон уйлари ёки меҳмонхоналарида қолиш уларнинг урф-одатлари ва анъаналари билан мулоқот қилиш ва ўрганиш имконини беради. Қишлоқда йил давомида мусиқа, рақс ва ўзбек меросининг бошқа жиҳатларини намойиш этадиган маданий тадбирлар ва фестиваллар ҳам ўтказилади" – деб таъкидлаган Саудия электрон нашри.
Мақола якунида, "Ўзбекистоннинг бой маданий меросини чуқурроқ англашни истаган ҳар бир киши бу қишлоқларга бориши шарт", – деб ёзган "Swift News".
