Ўзбекистон делегацияси Брюсселда бўлиб ўтаётган “Фуқаролик жамияти ҳафталиги – 2025”да иштирок этмоқда

Жорий йилнинг 17-20 март кунлари Брюссель шаҳрида Европа Иттифоқининг Иқтисодий ва Ижтимоий Қўмитаси (EESC) томонидан “Фуқаролик жамияти ҳафталиги – 2025” халқаро тадбири ўтказилмоқда. Ушбу нуфузли ҳафталикда Ўзбекистон фуқаролик жамияти делегацияси, жумладан, “Тараққиёт стратегияси” маркази вакиллари иштирок этмоқда.

Халқаро тадбир инклюзивлик, демократик иштирок ва ҳамкорликни ривожлантириш каби долзарб масалаларга бағишланиб, глобал миқёсда фуқаролик жамиятининг ўрни ва роли, инновацион ёндашувлар ҳамда илғор тажрибаларни муҳокама қилиш учун муҳим майдонга айланмоқда.

Тадбирда Европанинг барча мамлакатларидан етакчи фуқаролик жамияти институтлари, Европа Иттифоқининг тегишли идоралари ва аъзо давлатлар ҳукумат вакиллари, тадқиқотчилар, оммавий ахборот воситалари ҳамда халқаро ташкилотлар мутахассислари иштирок этмоқда. Улар жамиятнинг турли қатламларини жалб этган ҳолда, фуқаролик жамиятининг ривожланиши, демократик институтларни мустаҳкамлаш ва фуқароларнинг сиёсий жараёнлардаги иштирокини ошириш йўналишларида тажриба алмашмоқда.

Ушбу халқаро ҳафталик доирасида хорижий ҳамкорлар билан турли учрашувлар ҳам ташкил этилмоқда. Жумладан, “Тараққиёт стратегияси” маркази ижрочи директори Элдор Туляковнинг Европа Парламенти вице-президенти Юнус Омаржи билан учрашуви бўлиб ўтди.

Мулоқот чоғида фуқаролик жамиятини ривожлантириш, ислоҳотларни чуқурлаштириш ҳамда ижтимоий ташаббусларни қўллаб-қувватлаш масалалари муҳокама қилинди. Томонлар демократик иштирокни кенгайтириш, жамоатчилик фаоллигини ошириш ҳамда фуқаролик институтларининг самарадорлигини юксалтириш йўналишида фикр алмашдилар.

Ўз навбатида, Юнус Омаржи Ўзбекистонда амалга оширилаётган ислоҳотларга қизиқиш билдириб, мамлакатимизга ташриф буюриш истагини билдирди.

Шунингдек, халқаро ҳафталик давомида “Тараққиёт стратегияси” маркази раҳбари Европа Иттифоқининг Иқтисодий ва Ижтимоий Қўмитаси президенти Оливер Рёпке билан учрашди.

Мулоқот давомида фуқаролик жамиятини ривожлантиришга қаратилган муҳим ташаббуслар, демократик институтларни мустаҳкамлашда иштирок этиш ва инклюзив сиёсат юритишнинг аҳамияти ҳақида фикр алмашилди.

Учрашувда EESC томонидан ташкил этилган Европа Иттифоқининг Фуқаролик жамияти ҳафталиги тадбири муҳим аҳамиятга эга экани таъкидланди. Мазкур платформа фуқаролик жамияти вакиллари, сиёсатчилар ва экспертлар ўртасида мулоқотни ривожлантириш, ҳамкорликни мустаҳкамлаш ва долзарб ижтимоий-иқтисодий масалалар бўйича тажриба алмашиш имкониятини яратади. Ушбу тадбир фуқаролик фаоллигини ошириш, демократик қадриятларни мустаҳкамлаш ҳамда жамият олдида турган муаммоларни биргаликда ҳал этишга қаратилган ташаббусларни илгари суришда муҳим роль ўйнайди.

Бундан ташқари, учрашувда халқаро миқёсда ҳамкорликни кенгайтириш ва тажриба алмашиш орқали самарали ва барқарор ислоҳотларни илгари суриш, шу орқали янада инклюзив ва мустаҳкам жамиятни шакллантиришга эришиш мумкинлиги қайд этилди.