“Uzbekistan Airports” ва “EU Wings” қўшма корхона ташкил этиш масалаларини муҳокама қилди

Ўзбекистоннинг “Uzbekistan Airports” компанияси Италиянинг ҳаво кемаларига техник хизмат кўрсатишга ихтисослашган “EU Wings Srl” компанияси вакиллари билан музокара ўтказди.

Жорий йилнинг март ойида икки компания ўртасида ўзаро англашув меморандуми имзоланган бўлиб, унга мувофиқ томонлар “Навоий” аэропортида қўшма корхона ташкил этиш бўйича ҳамкорликда ишлаш кўзда тутилган. У ҳаво кемаларига асосий техник хизмат кўрсатиш, таъмирлаш хизматлари, шунингдек Ўзбекистоннинг бошқа халқаро аэропортларидаги самолётларга мунтазам хизмат кўрсатади.

“Италиянинг EU Wings компанияси мазкур лойиҳага қизиқиш билдираётган компаниялардан биридир. Яқинда салоҳиятли ҳамкор учун стратегик транспорт тармоғининг имкониятлари ва шунга ўхшаш корхоналарни ташкил этиш шартлари билан таништириш мақсадида “Навоий” аэропортига сафар уюштирилди”, - дея шарҳлайди “Uzbekistan Airports”.

Янги корхона нафақат маҳаллий авиакомпанияларга тегишли бўлган ҳар қандай модификациядаги ҳаво кемаларига хизмат кўрсатиши, балки, хорижий авиаташувчиларнинг буюртмаларини ҳам қабул қилиши режалаштирилган. Корхона қуввати бир вақтнинг ўзида битта тор фюзеляжли ва иккита кенг фюзеляжли самолётларни таъмирлаш ишларини олиб бориш имконини беради. Ходимларни танлаш масаласи ҳақида гап кетганда хорижлик мутахассислар билан бир қаторда корхонага тахминан 150 нафар маҳаллий ходим жалб этилади.