Ўлик денгиз минтақаси

Она табиатнинг Туркияга туҳфаси ўлароқ билинадиган Ўлик денгиз минтақаси, Ўрта Ер денгизининг дурдонаси сифатида ҳар йили минглаб сайёҳни қабул қилади.

Туркиянинг энг жозибадор туризм масканларидан бири бўлган Ўлик денгиз, Муғла вилоятининг Фетҳие туманида жойлашган бўлиб, ушбу ноёб дам олиш маскани диққатга сазовор жой сифатида маҳаллий ва хорижий сайёҳларнинг эътиборини тортади.

Албатта, бу масканлар нафақат пляжлари ва заррин қумлари билан машҳур, балки ўтмишда Ликия цивилизациясидан Рим империясигача турли цивилизацияларга мезбонлик қилган Ўлик денгиз, зиёрат қилинадиган жойлар нуқтаи назаридан ҳам тарихий мерос сифатида қардланади.

Ўлик денгиз минтақасининг диққатга сазовор жойлари

2006 йилда дунёнинг энг яхши пляжи сифатида тарихга олтин ҳарфлар билан ёзилган Ўлик денгиз минтақасида сиз баҳраманд бўлишингиз мумкин бўлган кўплаб гавжум пляжлар ва кўрфаз мавжуд.

1. Ўлик денгиз қўлтиғи ва пляжи. Ўлик денгиз минтақасининг бир томони ям-яшил ўрмонлар, бошқа томони мовий денгиз билан ўралган Ўлик денгиз пляжи ёзнинг жазирама кунларида ўзига хос тетиклаштирувчи туйғуларни уйғотадиган маскан ҳисобланади. Бу ерда сиз офтобда тобланишингиз ёки сув спорти турлари билан шуғулланишингиз, шунингдек денгизда шунчаки салқинлашингиз мумкин, аммо шуни ёддан чиқармаслик керакки, бу пляжда денгиз сатҳи бирдан чуқурлашади.

2. Белжекиз пляжи. Парапланда учишни хуш кўрадиган адреналин ихлосмандлари учун қўниш йўлаги ва денгиз-қум-қуёш триосидан воз кечмайдиганлар учун мукаммал жой бўлган Белжекизнинг (шунингдек, Белжейиз пляжи сифатида ҳам танилган) олтин ранг пляжлари ва мовий денгиз туташган нуқта сифатида ташриф буюрувчиларни мафтун этади.

3. Кумбурну пляжи. Кўк ва яшил рангларнинг бир нуқтада учрашиши билан пайдо бўлган Кумбурну пляжи - узун, оқ қумли ва Ўлик денгиз тоғлари манзарасига қараб офтобда тобланиш мумкин бўлган пляжи билан денгизда таътил ўтказишни севувчиларга ҳоҳ мовий денгизи билан, ҳоҳ Ўлик денгиз атрофидаги турар жой имкониятлари билан мукаммал имкониятларни таклиф этади.

4. Кидрак кўрфази. Ўлик денгиздан тахминан 3 километр узоқликда жойлашган Кидрак кўрфази арчалар билан денгиз ва пляж туташган гўзал манзараси билан ажралиб туради. Маҳаллий ва хорижлик сайёҳлар томонидан пикник майдони сифатида эътироф этилган Кидрак кўрфазида мангал майдонларидан тортиб пикник столларига қадар кўплаб имкониятлар сизни кутмоқда.

5. Ўлик денгиз миллий боғи. Ўлик денгиз табиат боғи сифатида ҳам танилган ушбу миллий парк, 1978-йилдан бери ташриф буюрувчиларга хизмат қилиб келмоқда. Парк, Кидрак ўрмон парки билан биргаликда дарахтзорлар ва денгизни туташтириши билан ҳам диққатга сазовор. Мовий денгиз сувида сузишни ва дарахтлар соясида табиат овозини тинглашни истасангиз албатта Ўлик денгиз миллий боғига ташриф буюринг.

6. Бабадағ. Ўлик денгизнинг спорт ва машғулотлар маскани деб ҳам номланадиган Бабадағ, парапландан АТВ телеканали саёҳатларига, чодир қуришдан (лагерлар) табиатда сайр қилишгача бўлган кўплаб оммавий тадбирлар ўтказиладиган жой сифатида ажралиб туради. Шу билан бирга, Ўлик денгизнинг ажойиб манзараси Бабадағ чўққисидан янада гўзалроқ кўринади.

7. Капалаклар водийси. Ўз номини минтақада ёз ойларида пайдо бўладиган капалаклардан олган Капалаклар водийси, тик қояликлар денгиз билан туташган ажойиб пляжга эга. Қояларга ёпишиб оладиган ранг-баранг капалаклар бу водийни унутилмас манзаралар саҳнасига айлантиради.

8. Ҳисарўну шаҳарчаси. Ёз мавсумида аҳолисининг катта қисмини Британиялик сайёҳлар ташкил этувчи Ҳисарўну, кундузлари мовий денгизда сузишингиз ва унинг марварид соҳилида дам олишингиз, кечқурунлари эса ҳаяжонли тунги ҳаётга ҳамроҳ бўлишингиз мумкин бўлган денгиз бўйидаги шаҳарча сифатида ажралиб туради. Ўлик денгиздан қуруқлик орқали етиб бориш мумкин бўлган Ҳисарўну шаҳарчасини Ўлик денгиз минтақасидаги ташриф буюрилиши шарт бўлган жойлар рўйхатига қўшишни унутманг!

9. Патара пляжи. Қадимги Патара шаҳри яқинида жойлашган Патара пляжи энг кўп ташриф буюриладиган қумли пляжи билан ажралиб туради. Патара пляжида дам олгандан сўнг, мозийга саёҳатга етакловчи Антик Патара шаҳрига ташриф буюришингиз мумкин.

10. Сакликент канёни. Камдан-кам учрайдиган табиат ҳодисаларининг ажойиб натижаларидан бири бўлган Сакликент канёни - ўпирилиш натижасида ҳосил бўлган 18 км узунликдаги канёни ва салқин суви билан эътиборни тортади. Шу билан бирга, канён тепасидаги терассаларда овқатланиб, сувнинг тинчлантирувчи овози остида ажойиб манзарадан баҳраманд бўлишингиз мумкин.

11. Патара қадимий шаҳри. Ўтмишда Ликияликлар яшаган қирғоқ бўйи шаҳарчаси ҳисобланган Патара, бугунги кунда ушбу цивилизацияга оид ўтмишни ўзида мужассам қилган антик шаҳри билан Ўлик денгиз минтақасида жойлашган шаҳарлар орасида алоҳида ўрин тутади.