Украиналикларнинг 82 фоизи мамлакатнинг НАТОга киришини қўллаб-қувватлайди

Украиналикларнинг 97 фоизи эса Россия устидан ғалаба қозонишига ишонади. Бу ҳақда АҚШдаги Халқаро республикачилар институти Украина ва жаҳондаги вазият ҳақида ўтказилган йирик сўров натижаларида маълум қилди.

Сўров натижаларига кўра, украиналикларнинг катта қисми (97 фоиз) ўз мамлакатлари Россия билан урушда ғалаба қозонишига ишонишади. Аҳолининг 74 фоизи эса Украина ўз ҳудудларини 1991 йил чегаралари доирасида қайтаришига ишончи комил. Ўтган йилнинг апрель ойида аҳолининг атига 53 фоизи шу қарашда эди.

Аҳолининг 8 фоизи Киев Қримни қайтариб ололмайди, 9 фоизи чегара ўтган йилнинг 24 февралида кенг кўламли босқин бошланишидан олдин мавжуд бўлган ҳолатига қайтади, деб ҳисобламоқда.

Украиналикларнинг катта қисми (91 фоизи) президент Володимир Зеленскийнинг ҳаракатларини маъқуллайди (58 фоизи уни "қатъий" маъқуллайди). Украина Қуролли кучларини аҳолининг 89 фоизи сўзсиз қўллаб-қувватламоқда, бош вазир Денис Шмигалнинг қарорларини эса респондентларнинг 43 фоизи маъқуллаган.

Қайси давлат ёки халқаро ташкилот Украинага кўпроқ ёрдам бергани ҳақида сўралганда, респондентларнинг кўпчилиги Польша ва АҚШни (71 фоиз), иккинчи ўринда Буюк Британияни (48 фоиз) қайд этишган.

Шунингдек, сўровдан маълум бўлишича, украиналикларнинг 82 фоизи мамлакатнинг НАТОга кириши учун овоз беришга тайёр. Бу ўтган йилнинг июнь ойига нисбатан 10 фоизга, 11 ой олдингига нисбатан 23 фоизга кўпдир.

Бундан ташқари, кўпчилик украиналиклар урушдан кейин ўз мамлакатларини қайта қуриш Россия ва руслар томонидан — Россия активлари ҳисобидан ёки репарациялар орқали тўланиши кераклигига амин. Бу бутун мамлакат бўйлаб сўралган украиналикларнинг 89 фоизининг фикрини ташкил қилган.