Украинадаги ҳарбий амалиётларга Суриядаги уруш тажрибасига эга генерал жавобгар бўлади

BBC манбалари Россия Украинадаги операциялар қўмондонлигини қайта ташкил этганини айтмоқда. Энди уларни Жанубий ҳарбий округ қўмондони, Суриядаги жанговар ҳаракатларда катта тажрибага эга генерал Александр Дворников бошқаради.

BBC манбасига кўра, 24 феврал куни Украинага бостириб кирган россиялик ҳарбий қисмларининг ўзаро мувофиқлаштириш ишлари жуда ёмон ташкиллаштирилган. Дворников Россиянинг Суриядаги операциялари бўйича катта тажрибага эга, бундан кейин Россиянинг умумий назорат ишлари яхшиланиши кутилмоқда.

Шунингдек, BBC манбаси музокаралар ҳарбий амалиётлардан устун бўлиши мумкинлигини таъкидлади, бунинг учун Кремл 9 май арафасида аҳолига қандайдир ютуқлар ҳақида хабар бериши керак бўлади.

Би-би-си манбасига кўра, агар Россия шу пайтгача қўшинларнинг жанг майдонида сезиларли муваффақиятларга эришишига тўсқинлик қилган ҳарбий тактикани ўзгартирмаса, у ҳолда украиналик қўшинлар сони жиҳатидан орқада бўлган тақдирда ҳам Россияга қарши самаралироқ кураша олади, чунки улар анча оқилона ҳаракат қиладилар, улар кўпроқ маневрли ва кутилмаган зарбалар беришга қодир.