Украина омбудсмани БМТнинг ҳарбий асирларни қатл этгани ҳақидаги айбловларига жавоб берди
Олий Раданинг инсон ҳуқуқлари бўйича комиссари Дмитрий Лубинец БМТнинг Украинадаги Инсон ҳуқуқлари мониторинги миссиясининг урушнинг ҳар икки томонини судсиз ва терговсиз маҳбусларни қатл этишда айблаган хулосаларига қўшилмайди.
"Украина томонидан қонун бузилишлари бўйича миссиянинг хулосаларини инкор этиб бўлмайдиган фактлар ва далиллар билан эшитмоқчиман", — дея таъкидлади Лубинец.
У, шунингдек, миссия раҳбари Матилда Богнер ва БМТ тизимининг Украинадаги доимий координатори Денис Браун билан бир неча бор шахсий учрашувлари чоғида улар ҳеч қачон россиялик ҳарбий асирларга муносабат масаласини кўриб чиқмаганидан ҳайратда қолган.
"Украина Женева конвенцияларига, халқаро ҳуқуққа риоя қилади ва халқаро ташкилотлар учун очиқ. Айниқса, Россия бизнинг еримизга жиноий равишда бостириб кирган, Украина фуқароларини ўлдирган ва ўғирлаган бир пайтда", — дея қўшимча қилди Омбудсман.
Аввалроқ БМТ Кузатув миссияси қўлида Украина ҳарбийлари томонидан 25 та, руслар томонидан 15 та маҳбус қатл этилгани ҳақида далиллар борлигини маълум қилган эди. Миссия раҳбари Матилда Богнер Украина расмийлари Украина Қуролли кучлари томонидан судсиз қатл этилган бешта ҳолат бўйича тергов бошлаганини таъкидлади.
