Трамп Путинга ишонди, разведка эса йўқ

Курск вилоятидаги Украина қўшинлари ўз позицияларини йўқотди, бироқ АҚШ президенти Доналд Трамп ва Россия президенти Владимир Путиннинг сўнгги баёнотларидан фарқли ўлароқ, Россия кучлари томонидан ўраб олингани йўқ. Бу ҳақда ўз ҳукуматларининг разведка маълумотлари билан таниш бўлган уч америкалик ва европалик расмийси Reuters агентлигига маълум қилди.

АҚШ разведка идоралари, жумладан, Марказий разведка бошқармаси ўтган ҳафта Оқ уй билан ўз баҳосини ўртоқлашди. Шунга қарамай, Трамп Украина қўшинлари Россия ғарбидаги Курск вилоятида қуршаб олинганини даъво қилишда давом этмоқда.

Америка ва Европа разведкаси Украина қўшинлари Россия кучлари томонидан кучли босим остида қолганини, аммо тўлиқ қуршаб олинмаганини кўрсатмоқда.

Трамп Россиянинг Украинага қарши урушини тезда тугатишга умид қилишини айтди. Мутахассислар Путиннинг 13-март куни Курскдаги Украина қўшинлари узилиб қолгани ва охир-оқибат “таслим бўлиши ёки ўлиши” кераклиги ҳақидаги баёнотини Россия украиналик аскарларнинг ҳаётини сақлаб қолиш учун ён бераётганини кўрсатувчи дезинформация сифатида баҳолади ва бу Путинга ўт очишни тўхтатиш бўйича музокараларда ёрдам беради.

14-март куни ижтимоий тармоқдаги постида Трамп Россия президентидан “тўлиқ қуршаб олинган” ва ҳимоясиз бўлган минглаб украиналикларнинг ҳаётини сақлаб қолишни сўраганини айтди. Путин агар улар таслим бўлишса, буни қилишини айтди.

Трамп душанба куни Вашингтондаги Кеннеди марказидаги нутқида ва сешанба куни Fox News телеканалига берган интервюсида “қуролда қолган” Украина кучлари ҳақидаги даъвони такрорлади.

Украина президенти Владимир Зеленский Украина қўшинлари қуршаб олингани ҳақидаги хабарларни рад этди ва Путин ердаги ҳақиқий вазият ҳақида ёлғон гапираётганини айтди. Украина раҳбари ўз армияси Курскда оғир аҳволда эканини тан олди ва Украина кучларини минтақадан сиқиб чиқаришга уринаётган Россиядан кейинги ҳужумларни кутмоқда.

Август ойидан бери Украина аскарлари Россиянинг ғарбий чегарасини Курск вилоятида ёриб ўтгандан сўнг, Киев аввал қўлга киритган деярли барча ҳудудларини йўқотди. Украина илгари 500 квадрат миля эрни назорат қилган бўлса, очиқ манба маълумотларига кўра, ҳозир атиги 20-30 квадрат миляни эгаллайди.

14-март куни АҚШда жойлашган Урушни ўрганиш институти можароларни мониторинг қилиш маркази “Россия кучлари Курск вилоятида ёки Украинанинг фронт чизиғи бўйлаб кўп сонли Украина қўшинларини қуршаб олганини кўрсатувчи ҳеч қандай геолокацион далилларни кузатмаганини” айтди.