Тошкентлик авторитет "Шуҳрат Дўмбробод" устидан бўлиб ўтаётган ёпиқ суд тўсатдан тўхтатилди. Сабаби...

8 май куни Жиноят ишлари бўйича Тошкент шаҳар суди судяси Зафар Нурматов Шуҳрат Дўмбробод лақаби билан машҳур бўлган Шуҳратулла Носировга нисбатан олти ой муқаддам бошланган ёпиқ суд жараёнини вақтинча тўхтатиш ҳақида қарор чиқарди.

Бу ҳақда 15 май куни ёпиқ суд жараёнида иштирок этган айбланувчининг яқинлари ҳамда гувоҳлар маълум қилди, деб ёзмоқда centralasian.org.

Суҳбатдошлардан бири маълум қилишича, Зафар Нурматов прокурор Бахтиёр Самуковнинг судя ҳамда унинг маслаҳатчиларига билдирган ишончсизлиги сабаб ишни вақтинча тўхтатишга мажбур бўлган.

62 ёшли Шуҳрат Дўмбробод номи билан машҳур Шуҳрат Носиров виждон эркинлигини бузиш, товламачилик, ҳужжатларни ўғирлашда, унинг 63 ёшли акасиШавкат Носиров эса талон-тарож ва порахўрликда айбланмоқда.

Шуҳрат Носиров ва унинг акаси устидан суд иши ўтган йилнинг 10 декабрида очилган эди.

Ёпиқ суд жараёнида қатнашган гувоҳлардан бирининг сўзларига қараганда, Носировнинг акасига суд ҳукми ўқилиш арафасида прокурор Бахтиёр Самуков кутилмаган тарзда суд кенгашига ишончсизлик билдирган.

- Суд прокурорнинг бу кутилмаган қароридан ҳайрон бўлди. Судя шу заҳотиёқ ажрим чиқариб ишни якунлади ва уни Олий судга юборишди, - дейди гувоҳлардан бири.

Айбланувчиларнинг қариндошларидан бири айтишича, прокурорнинг ишончсизлик билдиришига судянинг такрорий экспертиза ўтказишни рад этгани сабаб бўлган.

- Прокурор биринчи терговни қайта тиклашни сўради. Шундан сўнг суд маслаҳатхонага кириб кетди. Қайтгач эса прокурорнинг илтимосини рад этди. Шундан сўнг прокурор қайта экспертиза қилишни талаб қилди, лекин судя бу мурожаатномани бажаришдан бош тортди. Шундан сўнг прокурор ўрнидан туриб, судяга шундай мурожаат қилди: Сиз илгари санкциялар бўйича апеляцияларда қатнашгансиз, сизнинг бетарафлигингизга шубҳам бор . Шундан сўнг судя прокурорнинг судялар кенгашини ўзгартириш ҳақидаги талабини қабул қилди, - дейди гувоҳлардан бири.

Шуҳрат Носировнинг келини Шаҳноза Носирова суд ҳукмининг эълон қилинишини тўсатдан бу тарзда тўхтатиш шубҳали деб ҳисобламоқда.

- Судя қайнотамни панжара ортига жўнатиш учун сабаб йўқлиги ҳақида айтаётган эди. Шунинг учун прокурор судга ишонч билдирмади. Суд маслаҳатчилар хонасига кириб чиқди, судя эса прокурорнинг протестини рад этди. У ҳукмни ўқимади. Ҳамма судянинг менинг қайнотам ва акаларига қараб айтган сўнгги сўзларини эслаб қолди. Ҳамманинг олдида виждоним тоза! деди ва йиғилиш хонасидан чиқиб кетди. Буларнинг барчаси судя ака-ука Носировларни оқлашни истаганини тасдиқлайди, лекин бунга унинг кучи етмади. Шубҳасиз, қаердандир босим ўтказишаётгани кўриниб турибди, - деди Носировнинг келини.

Аввалроқ, суд иштирокчилари Шухрат ва Шавкат Носировга прокурор Бахтиёр Самуков беш йилдан қамоқ жазоси сўганаи тўғрисида маълум қилишган эди. Адвокатлар эса мижозларининг оқланишини сўраган. Ака-ука Носировлар ўзларига қўйилган барча айбловларни рад этишган.

Шухрат ва Шавкат Носировлар ўзларининг қариндошлари Баҳодир Шароповнинг ҳуқуқни муҳофаза қилиш органларига ёзган аризаси сабаб қўлга олинган эди.

Адлия органларидаги манбанинг маълум қилишича, 14 май куни Ўзбекистон Республикаси Олий суди ака-ука Носировларнинг ишини Жиноят ишлари бўйича Сирдарё вилоят судига жўнатган эди. 1994 йилда Жиноят ишлари бўйича Тошкент шаҳар суди Шуҳратулла Носировни уюшган жиноятчиликда айбдор деб топиб, 15 йилга озодликдан маҳрум қилган эди. Аммо турмада унинг жазони ўташ муддати бир неча бор узайтирилган. Шу сабаб Носиров панжара ортида 23,5 йил ўтиришига тўғри келган.

2016 йилнинг 18 августида Шуҳратулла Носиров жазо муддати тугаши муносабати билан озод этилди.

Тошкентликлар Шуҳратулла Носировни ўтган асрнинг 90-йилларида одамларга ўғирланган автомобилларини топишда ёрдам берганини яхши эслашади.

ca-news.org