Самарқандда Lacetti билан тўқнашган мотоцикл ҳайдовчиси ва унинг фарзанди ҳалок бўлди
Самарқанд вилояти Иштихон туманида Lacetti ва мотоцикл иштирокида йўл-транспорт ҳодисаси содир бўлди. Бу ҳақда MY5 телеканалининг Hudud дастурида хабар берилди.
Қайд этилишича, ҳолат туманнинг Одил маҳалласи ҳудудида содир бўлган. Тезликни меъёридан оширган Lacetti қарама-қарши томондан йўналишида келаётган мотоциклга келиб урилган. Оқибатда мотоцикл ҳайдовчиси ва 13 ёшли фарзанди тан жароҳати олиб, воқеа жойида вафот этган.
«Мотоцикл анча эски эди, ёруғлиги етарли эмасди, менга кўринмади. Фақатгина урилганда билдим. Ақл-ҳушим жойида, кўрганимда «обгон»га чиқмасдим. Тўғри, менда ҳам айб ўтди. Бир сония бутун ҳаётимни шунчалар ўзгартириб юборди», — деди ҳайдовчи.
У ҳозирда Иштихон тумани ИИБ вақтинча сақлаш ҳибсхонасида сақланмоқда.
Ҳолат юзасидан Жиноят кодексининг 266-моддаси 3-қисми «а» банди (Транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлса) билан жиноят иши қўзғатилган, дастлабки тергов ҳаракатлари олиб борилмоқда, дейилади хабарда.
