Саакашвилининг танасида маргумуш борлигини аниқланди
Қамоқда сақланаётган Грузиянинг собиқ президенти Михаил Саакашвилининг тиббий текширувлари унинг танасида маргумуш борлигини кўрсатди. Бу ҳақда душанба куни Саакашвилининг адвокати Шалва Хачапуридзе маълум қилган.
“Биз ҳали тирноқ синовларини олганимиз йўқ, улар бугун келишади, бироқ телефон орқали маълум бўлишича, тадқиқот натижасида яна бир [заҳарли] модда, маргумуш аниқланган”, — дея адвокатнинг сўзларидан иқтибос келтирган Мtavari телеканали.
Шунингдек, душанба куни Саакашвили узоқ вақтдан бери биринчи марта чегарани ноқонуний кесиб ўтиш иши бўйича суд мажлисида иштирок этиши кутилмоқда, деди адвокат. “Биз суд жараёнининг қолдирилганига сабабчи бўлиб қолмаслигимиз учун у бугун судга келишга қарор қилди”, — деди адвокат. Унга кўра, Саакашвилининг аҳволи оғир ва уни кўчириш учун махсус стул керак бўлади.
Аввалроқ Саакашвилининг оғир металлар, жумладан симоб билан заҳарланиши эҳтимоли ҳақида хабар берилган эди. Грузия ҳукумати собиқ президентнинг заҳарланиши эҳтимоли ҳақида эрта хулосалар чиқаришдан тийилишга чақирмоқда.
Саакашвили 2021 йил октябрь ойида бўлиб ўтадиган муниципал сайловлардан бир кун олдин Грузияга яширинча келган. Шундан сўнг у ҳибсга олиниб, Рустави шаҳридаги қамоқхонага жойлаштирилганди. Айни дамда Собиқ президент қамоқхонада оғир хасталикка чалинганини бир неча бор таъкидлаган. Саакашвилининг адвокатлари ва тарафдорлари уни даволаниш учун хорижга юборишни талаб қилмоқда.
