RuTube видеохостинг сайти App Store дўконидан йўқолди

Россия расмийлари You Tube ўрнини босувчи сифатида тарғиб қилаётган RuTube видеохостинг сайти App Store дўконидан йўқолди.

RuTube у олиб ташланганлигини даъво қилмоқда. «Бу Америка компаниясининг санкциялари оқибати бўлди, бунинг натижасида фойдаланувчилар учун мобил илова орқали хизматларимизга кириш қийин бўлди», — дейилади видеохостинг сайтида.

Август ойи бошидан бери россиялик фойдаланувчилар You Tube ишида катта узилишларга дуч келишмоқда: VPN хизматларисиз видеолар секин юкланади ёки умуман юкланмайди. 7 август, чоршанба куни Медуза телекоммуникация бозоридаги манбага таяниб, Россия расмийлари You Tube'ни 128 кбпс га секинлаштиришга қарор қилганини ёзди.