Россия армиясининг Украинадаги ҳақиқий ютуқлари Кремл баёнотларидан беш баробар камроқ

Россия армиясининг Украинадаги ҳақиқий ютуқлари Кремл баёнотларидан беш баробар камроқ – ISW.

Агар Россия президенти йил бошидан буён армия 3 минг квадрат километрдан ортиқ ҳудуд ва 133 та аҳоли пунктини эгаллаганини даъво қилган бўлса, Урушларни ўрганиш институти (ISW) ҳисоб-китобларига кўра, Россия назоратига атиги 622 квадрат километр ҳудуд ва 64 та аҳоли пункти ўтган.

Институтнинг таъкидлашича, ўхшаш тафовутлар Россия Бош штаби бошлиғи Валерий Герасимов томонидан эълон қилинган июн ойи статистикасига ҳам тегишли. У 636 квадрат километр ҳудудда олдинга силжиш ва 29 та аҳоли пункти эгаллангани ҳақида хабар берган эди.

ISW эса амалдаги олдинга силжишни тахминан 30 квадрат километр ва 20 та аҳоли пункти (шу жумладан, Россия бўлинмалари вақтинчалик кира олган ҳудудлар) деб баҳолайди.

Экспертларнинг фикрича, бундай баёнотлар Кремль ахборот кампаниясининг бир қисми бўлиб, у Россия ғалабасининг муқаррарлиги ва Украина мудофааси заифлашгани ҳақида таассурот уйғотишга қаратилган.

Таҳлилчиларнинг қайд этишича, Россия армиясининг янги ютуқлари ҳақидаги хабарларни фаол тарқатиш халқаро аудиторияга, жумладан, Москванинг Вашингтон билан алоқалари арафасида таъсир ўтказишга мўлжалланган бўлиши мумкин.

ISW, шунингдек, июн ойида Россия қўшинлари эгаллаган ёки олдинга силжиган ҳар бир квадрат километр ҳудуд учун ўртача 1298 нафар ҳарбий хизматчини йўқотганини ҳисоблаб чиқди. Институт баҳосига кўра, бу ҳужумкор операцияларнинг қимматга тушаётганидан ва уларнинг самарадорлиги чекланганлигидан далолат беради.

Таҳлилчилар Кремлнинг Россия қўшинлари олдинга силжиётгани ҳақидаги баёнотлари Владимир Путин ва Доналд Трамп ўртасида 4 июл куни бўлиб ўтган телефон мулоқотидан сал олдин янграганига эътибор қаратмоқда. Шу билан бирга, Вашингтон Украинага ҳарбий ва разведка кўмагини беришда давом этмоқда, АҚШ вице-президенти Жей Ди Вэнс эса Россиянинг кейинги ҳужумлар учун салоҳияти аста-секин тугаб бораётгани ва ҳар бир янги олдинга силжишнинг баҳоси ғоят юқорилигича қолаётганини таъкидлади.