Қайси давлат раҳбарлари халқаро жиноий жавобгарликка тортилган?
Владимир Путин халқаро жиноятда айбланган еттинчи давлат раҳбари бўлди. Халқаро жиноий суд (ХЖС) томонидан давлат раҳбарларининг айбланиши жуда кам кузатиладиган ҳолат. Шу кунгача халқаро жиноятда айбланган давлат раҳбарларидан иккиси оқланган, иккитаси ҳукмгача вафот этган, яна бирининг судга топширилиши кутилмоқда.
Кот-д'Ивуар президенти Лоран Гбагбо 2011 йилда Халқаро жиноий судга тортилган биринчи давлат раҳбари бўлган. У 2010–2011 йилларда мамлакатдаги қуролли можаролар пайтида инсониятга қарши жиноят содир этганликда айбланган. Аммо 2019 йилда Гбагбо оқланган.
Кениянинг бўлажак президенти Ухуру Кениата 2007–2008 йилларда мамлакатдаги сиёсий инқироз даврида инсониятга қарши жиноят содир этганликда айбланган. Бу айбловлар 2014 йил декабрида далил йўқлиги сабабли ундан олиб ташланган.
Судан президенти Умар аль-Башир 2019 йилдан бери ўз мамлакатида ҳибсда ва Гаагага экстрадиция қилиниши кутилмоқда. У Дарфур аҳолиси ичида учта этник гуруҳнинг геноцидини уюштириш ва амалга оширишда айбланмоқда.
2011 йилда ХЖС Ливия раҳбари Муаммар Қаддафийни ҳибсга олишга ордер берган. Аммо улар буни амалга оширишга улгурмадилар — тўрт ой ўтгач, Қаддафий Миллий ўтиш кенгаши жангарилари томонидан ўлдирилган.
Либерия президенти Чарльз Тейлор қамоқ жазосига ҳукм қилинган биринчи давлат раҳбари бўлди. У уруш жиноятларини содир этишга кўмаклашиш ва инсониятга қарши жиноятларда шерикликда айбдор деб топилди. 2012 йилда суд Чарльз Тейлорни 50 йилга озодликдан маҳрум қилди.
Сербиянинг собиқ президенти Слободан Милошевич БМТнинг Гаагадаги қамоқхонасида ҳукмгача вафот этган.
