Путин келажакда Россия ва Хитой ҳарбий иттифоқининг тузилиши амалга ошиши ҳақида гапирди
Россия президенти Владимир Путиннинг айтишича, айни пайтда Россия-Хитой ҳарбий иттифоқининг тузилишига ҳожат йўқ, лекин, бу келажакда рўй бериши мумкин. Путиннинг бу сўзлари АҚШ билан муносабатлар кескинлашаётган ҳозирги даврда Москва ва Пекин ўртасидаги алоқаларнинг мустаҳкамланиб бораётганидан дарак беради.
Путин 22 октябрь куни ташқи сиёсат бўйича экспертлар билан бўлган видеоконференсияда қатнашди. У Хитой ва Россия ўртасида ҳарбий иттифоқ бўлиши мумкинми, деган саволга шундай жавоб берди:
“Ҳозир бизга бунинг кераги йўқ. Лекин, назарий жиҳатдан қарайдиган бўлсак, бу иттифоқнинг тузилиши эҳтимоли баланд. Буни вақт кўрсатади”.
Шунингдек, Владимир Владимирович Россия ўзининг ҳарбий технологияларини Хитойга етказиб бергани ва улар Хитой ҳарбий тизимининг ўсишига катта ҳисса қўшганини таъкидлади. Аммо Путин масаланинг нозиклигини айтиб, Хитойга айнан қандай қуроллар берилганини очиқламади.
“Шубҳасиз, бизнинг Хитой билан ҳарбий ҳамкорлигимиз Хитой армиясининг салоҳиятини оширмоқда” дейди Россия раҳбари.
Россия ва Хитой шу пайтгача ўзларининг “стратегик ҳамкор эканликларини” таъкидлаб келишган. Аммо, улар ҳарбий иттифоқ ҳақида гапиришдан бош тортишаётганди.
