Президент топшириғи: янги йилдан коммунал хизматлар нархи камида 20 фоизга оширилади

Шавкат Мирзиёев мутасадди вазирликларга коммунал хизматлар нархини тўлиқ қоплашни ҳисобга олган ҳолда, тарифларни белгилаш тартибини жорий этишни топширган. Шу тариқа, янги йил бошидан иссиқ ва совуқ сув таъминоти, иситиш ва канализация тизими тарифлари нархи камида 20% га оширилади.

 Ўзбекистонда келаси йил бошидан иссиқ ва совуқ сув, иситиш таъминоти, шунингдек, канализация тарифлари нархи оширилади. Шавкат Мирзиёев 5 сентябрь куни ўтказилган йиғилишда ҳукуматга ушбу хизматлар тарифи таннархларини қоплаш учун нархларни ошириш бўйича топшириқ берган.

Ҳозирда тарифлар харажатларни қопламайди

Togri.uz уй-жой коммунал хизмат кўрсатиш вазирлиги билан боғланиб, Ўзбекистонда сув таъминоти хизматларининг таннархи тўлиқ қопланмаслигини тасдиқлади. Бугунги кунда 1 куб/метр ичимлик суви нархи аҳоли тўлаётган нархдан камида 20% кўпроқ. Иссиқ сув, иситиш ва канализация хизматларида ҳам айни вазият. Ҳозирги тарифлар ушбу турдаги хизматларнинг нархини қопламайди ва давлат бюджетидан камомад учун қўшимча тўланиши керак бўлмоқда.

Бундан ташқари, йил охиригача коммунал хизматлар таннархи янада ошиши мумкин.

Хусусан, Тошкент иссиқлик коммуникацияларини янгилаш учун 182 миллион АҚШ доллари миқдорида кредит олиниб, иссиқлик таъминоти таннархи ва тарифларини ошириш ҳисобига сўндирилади.

Ҳукумат зарарни бюджетдан қопламоқчи эмас

Аввалроқ, ҳукумат аҳолини электр, табиий газ, ичимлик суви, иссиқ сув ва бошқа коммунал хизматлар билан таъминлайдиган ташкилотларнинг зарарини молиялаштиришни режалаштирмаслигини маълум қилганди. Ушбу масала бўйича президент аҳолини тоза ичимлик суви билан таъминлаш масалаларига бағишланган йиғилишда муҳокама қилган эди. Президент Молия вазирлиги ва уй-жой коммунал хизмат кўрсатиш вазирлигига тарифларни қайта кўриб чиқиш юзасидан топшириқ берган.

"Молия вазирлиги, уй-жой коммунал хизмат кўрсатиш вазирлиги олдига 2020 йилнинг 1 январидан бошлаб хизматлар таннархини ва модернизация харажатларини тўлиқ қоплашни ҳисобга олган ҳолда тарифлар белгиланиши тартибини жорий этиш вазифаси топширилган".

Тошкентда сув таъминоти арзон

Уй-жой коммунал хизмат кўрсатиш вазирлиги Тошкент шаҳридаги совуқ сув учун жорий тарифлар мамлакатнинг бошқа кўплаб минтақаларига қараганда паст эканлигини маълум қилди. Масалан, ҳозирда Тошкент шаҳрида бир куб/метр ичимлик суви нархи 410 сўмни ташкил этади. Хоразм ва Қорақалпоғистонда эса совуқ сув тарифи 2000 сўмгача.

«Мамлакат ҳудудлари ўртасидаги нарх тафовутининг асосий сабаблари сув омборларининг узоқлиги ва аҳоли пунктларига сув ташиш харажатлари ҳисобланади. Тошкент мисолида кўплаб сув омборлари мавжуд ва улар шаҳарга яқин. Мисол учун, Қорақалпоғистонда сув қувурлари орқали юзлаб километрга ташилади, бу эса, албатта, уларнинг қийматига таъсир қилади», дея хабар беради вазирлик матбуот хизмати.