Патриарх Кирилл Швейцарияда жосуслик қилган бўлиши мумкин
Рус православ патриархи Кирилл 1970 йилларда Женевада Совет Иттифоқи учун жосуслик қилган бўлиши мумкин, у ерда у Рус православ черковининг Бутунжаҳон черковлар кенгашидаги вакили бўлган.
Бу ҳақда SonntagsZeitung нашрига асосланиб, “РБК-Украина” нашри хабар бермоқда.
Нашрнинг ёзишича, махфий архивлар очиқланиши Кириллнинг "КГБ"да ишлагани ва разведкачи бўлганини кўрсатади. У Женевада бўлганида жосуслик билан шуғулланган. У ерда унинг асосий вазифаси ўша пайтда кўплаб совет агентларини ўз ичига олган Бутунжаҳон черковлар кенгашига таъсир ўтказиш бўлган.
Рус православ черкови оммавий ахборот воситаларида бундай маълумотларга бирор бир изоҳ беришдан бош тортди. Шу билан бирга, Россиянинг Швейцариядаги элчихонаси нашрни русофобияда айблади ва Патриарх Кириллга қўйилган барча айбловларни рад этди.
Россиянинг Украинага қарши кенг кўламли агрессив урушида кўплаб тинч аҳоли ҳалок бўлаётганига қарамасдан, Патриарх Кирилл бу урушни очиқчасига қўллаб-қувватлайди.
Эслатиб ўтамиз, аввалроқ Патриарх Кирилл Украинага қарши урушда ўлиш гўёки Россия Федерацияси аскарларининг барча гуноҳларини ювишини айтган эди.
Патриарх Кирилл Россиядаги диндорларни бир неча кун Владимир Путиннинг саломатлиги учун ибодат қилишга чақиргани билан ҳам машҳур.
