Оталикни англаш учун суднинг қора курсисида ўтириш шартми ?

2019 йилнинг баҳор ойлари...
Файзуллаевлар (исм ва фамилиялар ўзгартирилган) хонадонида данғиллама тўй. Келин бўлмиш алланечук ҳис-туйғулар, бир олам ширин орзулар оғушида қадам босиб келмоқда.
Уни келгуси йилда нималар кутаётгани эса фақат яратганга аён.
Ҳар бир эркак ва аёл турмушга, янги оила тузишга қадам қўяр экан, жуфти билан бахтли ҳаёт кечиришни, жажжи фарзандларини қўлидан тутиб бирга вояга етказишни ўйласа керак.
Маҳмуд ва Дилобар ҳам олдинига чиройли турмуш кечиришди, бироқ орадан озмунча вақт ўтмасдан ораларида келишмовчиликлар пайдо бўла бошлади. Кети узилмаётган жанжаллару, айтишувлар, нотинчлик иккисининг ҳам жонига тегди.
Турмуштнинг муштига чидаган яшайди, деб ёши улуғлар бекорга айтишмаган. Дилобар ҳам тез таслим бўлди ва тез орада фарзандли бўлишига қарамасдан келинлик уйини тарк этди.
Ҳаммаси шундан сўнг бошланди.
2020 йилнинг мартида ўғлини дунёга келтирди ва алам устида эрини алимент тўлаши керак энди дея, судга берди.
Фарзанд таъминоти сабаб даъво қаноатлантирилди. Иш ҳужжати Бюронинг Андижон туман бўлими давлат ижрочисига келиб тушди.
Давлат ижрочиси Маҳмудни кўп бора боласининг таъминоти учун алимент тўлаши зиимасидаги мажбурияти эканини тушунтиришга уринди. Бироқ, аёлидан кўнгли совиган эр боласига ҳам эътибор қилмади.
Лекин, нима бўлса ҳам у норасида, у ўз пушти камаридан бўлган зурриёди. Аёли билан орасидан қандай “ола мушук”лар ўтмасин, фарзанди олдида масъул ва жавобгар. Шунинг учун ҳам унинг номи ОТА. Қилаётган ишлари эса оталик номига номуносиб эди.
Шу сабабдан, суднинг қора курсисида 15 сутка ўтриб ҳам чиқди, бироқ кор қилмаган кўринади. Жазосини ўтаб чиқиб ҳам боласига алимент тўламади. Салкам 11 млн. сўм алимент пулларини ололмасдан, ўғлини бир ўзи ҳам она, ҳам ота бўлиб боқаётган Дилобар бюро ходимларига мурожаат қилди. Маҳмудга тегишли ҳужжатлар судга юборилди. Энди иш Жиноят кодексидаги оғирроқ модда билан малакаланаётган эди. Чунки, қилмиши узоқроқ муддатга қамалиш важини келтириб чиқарганди.
Ҳаа, эркин ҳаёт ҳаммага ёқади. Маҳмуд ҳам Бюро ходимларидан тез орада иши судда кўрилишини эшитгач, ўзига келди. Ўғли учун 10 млн 600 минг сўмни аёлининг пластик рақамига ўтказиб берди.
Биз бу билан Дилобарни ёки Маҳмудни ҳааркатларини оқламоқчи эмасмиз. Хулоса ўзингиздан.
Фақат, айтар сўзимиз, оила ришталарини боғладикми, уларни мустаҳкамлашга ҳаракат қилайлик, бирга бўлиш учун эмас, биргаликда курашайлик.

Ойистахон Абдурахманова,
Бюронинг Андижон вилоят
бошқармаси катта инспектори