Оққўрғон туманида хотин-қизлар бандлигини таъминлаш борасидаги ишлар Сенат Раиси томонидан назоратга олинди
Олий Мажлис Сенати Раиси Танзила Нарбаева бошчилигидаги ишчи гуруҳ Оққўрғон туманида бўлиб, хотин-қизлар бандлигини таъминлаш, уларни тадбиркорлик фаолиятига кенг жалб қилишга қаратилган ишлар ҳолати билан танишди.
Сенат Раиси дастлаб тумандаги Мономарказда бўлиб, хотин-қизларни касбга ўқитиш орқали бандлигини таъминлаш борасидаги ишлар, яратилган шарт-шароитлар билан танишди, марказда касб-ҳунар ўрганаётган хотин-қизлар билан мулоқот қилиб уларнинг келгусидаги фаолияти юзасидан мулоқот қилди ҳамда тегишли таклиф ва тавсиялар берди.
Шундан сўнг республика ишчи гуруҳи аъзолари, туман ҳокими, сектор раҳбарлари, Тошкент вилояти ҳамда Оққўрғон тумани масъуллари, маҳалла фаоллари билан мулқот ўтказилди. Учрашув давомида хотин-қизларни касб-ҳунарга ўқитиш, бандлигини таъминлаш ва тадбиркорликка жалб қилиш бўйича ишларни мутлақо янгича ёндашувлар ва тизим асосида ташкил қилиш, бу борада Янгийўл туманининг «Қирсадақ» маҳалласида жорий этилган тизимни қўллаш бўйича топшириқлар берилди.
Янги тизим асосида аввало тумандаги барча маҳаллаларда хонадонбай хатлов ўтказган ҳолда ишсиз, ишлаш истагини биладирган хотин-қизларни, уларнинг имконият ва эхтиёжлари аниқланади ҳамда маҳаллалар кесимида хотин-қизларни ҳар томонлама қўллаб-қувватлашга қаратилган аниқ манзилли чоралар белгиланади.
Бунда асосий эътибор хотин-қизларнинг бандлигини таъминлаш, тадбиркорлик фаолиятини қўллаб-қувватлаш билан бирга, ижтимоий ҳимояга мухтож хотин қизларга зарур тиббий, ижтимоий, психологик ва ҳуқуқий ёрдам кўрсатиш, аҳоли томорқасидан самарали фойдаланиш, маҳаллада ижтимоий-маънавий муҳитни янада мустаҳкамлашга қаратилади.
Мулоқот жараёнида Оила ва хотин-қизлар қўмитаси раиси Озода Парпибоева, «Халқ банки» бошқаруви раиси ўринбосари Гулзода Рашидова, шунингдек, вилоят ва туман масъуллари сўзга чиқиб, белгиланган вазифаларни амалга ошириш бўйича фикр-мулоҳазаларини билдирдилар.
Шундан сўнг Т.Нарбаева «Қаҳрамон» маҳалласида яшовчи фуқаро Т.Мансуров хонадонига ташриф буюриб хонадонда томорқадан қолаверса хонадондаги мавжуд имкониятлардан самарали фойдаланиш борасида хонадон соҳибларининг тажрибаси билан танишди. Таъкидлаш жоизки хонадон соҳиблари томорқасида уч марта ҳосил олиш билан бирга, асал етиштириш, чорвачилик фаолияти билан шуғулланиб ўтган йили камида 300 млн сўм даромад кўрган. Т.Нарбаева маҳаллаларда мана шундай тадбирли аҳоли сафини кенгайтириш, одамларнинг томорқадан унумли фойдаланиши орқали камбағалликни қисқартириш мумкинлигини алоҳида таъкидлаб, бу борада қатор таклиф ва тавсияларини билдирди.
Шунингдек, туман масъуллари ҳамда «Маҳалла еттилиги»га уй шароитида ўзини ўзи банд қилган фуқароларнинг фаолиятини расмийлаштириш, оилавий тадбиркорлик лойиҳаларини кенгайтириш, дуал таълим тизими асосида аёлларни касб-ҳунарга ўқитиш орқали кооперация шаклида бандлигини таъминлаш бўйича вазифалар белгилаб берилди.
