Ниқоб «мода»си

Бугун тиббий ниқоб тақишнинг аҳамияти ва бу ҳимоя воситасини нима учун тақаётганимизни барча яхши билади. Тўғри, ҳалигача орамизда ниқобдан тўғри фойдаланмаётганлар бор, аммо ҳозир гап масаланинг бошқа жиҳати ҳақида.

Сўнги вақтларда мени кўпроқ ушбу ҳимоя воситасининг аёллар учун мўлжалланган айрим турлари ҳайратга солмоқда. Масалан, гулли матодан тайёрланган ёки турли рангдаги, баъзан дур қадаб тикилган ниқоб тақиб юриш урфга киряпти. Ҳатто, келин-куёв учун алоҳида ниқоблар “яратилмоқда”. Бу нимадан дарак? Ёки бу эл бошига офат ёғилиб турган таҳликали бир даврда ўзини кўз-кўз қилишнинг, мақтанчоқликнинг бир кўринишими? Ва ёки ҳар недан гўзаллик ярата олиш намунасими ёхуд тиббий саводсизликми? Билмадим-у, аммо ҳар қандай ортиқча унсур вирус ташишга хизмат қилади. Шу боис, менимча, буларнинг бари бачканаликдан бошқа нарса эмас.

Эсингизда бўлса, ҳиндистонлик бизнесмен Шанкар Кураде кумуш ниқобли ҳамшаҳрига ҳавас қилиб, 4 минг долларлик тилла ниқоб ясаттирган эди. Ўзи Ҳиндистонда вазият оғир бир пайтда бу эркак шу маблағни хайрли ишга сарфласа бўлмасмиди? Эндигина ниқоб тақиш ёдига тушиб қолган Дональд Трамп эса ниқобининг чап пастки қисмига президентга тегишли махсус тилла муҳрни бостириб олган. Ажабо!

Хуллас, ниқоб харид қилаётганда кўринишига эмас, аввало табиий матодан тикилганига эътибор беринг. Унутманг, сунъий мато вирус яшаши учун қулай шароит яратади. Номига тақилган ниқоб эса сизни касалликдан ҳам номигагина ҳимоя қилади. Кейин ўпкаланиб юрманг!

Қизлархон

Manba: fikrat.uz